بریلی، 28 دسمبر (ہ س)۔ عام آدمی پارٹی کے راجیہ سبھا ایم پی سنجے سنگھ نے اتوار کو بریلی میں سیاسی ماحول کو گرما دیا۔ وہ علامتی طور پر بیل گاڑی پر سوار ہو کر فتح گنج ایسٹ کے جرول گاؤں پہنچے اور ایک عوامی ریلی سے خطاب کرتے ہوئے وزیر اعظم نریندر مودی، بی جے پی حکومت اور بجرنگ دل پر شدید حملہ کیا۔ ان کی تقریر میں جارحانہ لہجہ واضح طور پر جھلک رہا تھا۔

بنگلہ دیش کی صورتحال کا ذکر کرتے ہوئے سنجے سنگھ نے کہا کہ وزیر اعظم کو وہاں کے واقعات پر سخت موقف اختیار کرنا چاہیے تھا، لیکن وہ خاموش ہیں۔ انہوں نے الزام لگایا کہ اڈانی کا بنگلہ دیش میں پاور بزنس ہے، اس لیے وزیر اعظم اپنے دوست کو نقصان پہنچنے کے ڈر سے کچھ نہیں بول رہے ہیں۔ انہوں نے کہا کہ مودی ملک کے نہیں بلکہ اڈانی کے وزیر اعظم بن کر کام کر رہے ہیں اور ملک کے اثاثے بیچے جا رہے ہیں۔

انہوں نے کرسمس سے قبل چرچ تنازعہ پر بجرنگ دل پر حملہ کرتے ہوئے کہا کہ اگر آپ ہنومان چالیسہ پڑھنا چاہتے ہیں تو کسی مندر میں کریں، آپ کو کس نے یہ حق دیا کہ آپ چرچ یا مسجد میں جاکر انتشار پھیلاو؟ انہوں نے ہوٹلوں میں تشدد کے واقعات پر بھی سوال اٹھایا۔

ایس آئی آر کے معاملے پر سنجے سنگھ نے الزام لگایا کہ بہار کی طرح اتر پردیش میں بھی ووٹ کا حق خطرے میں ہے۔ انہوں نے کہا کہ آئین اور بابا صاحب امبیڈکر کے ذریعہ فراہم کردہ حقوق کو کمزور کیا جا رہا ہے، اور دلتوں اور پسماندہ طبقات کے حقوق کو چھینا جا رہا ہے۔

---------------

ہندوستان سماچار / عبدالسلام صدیقی