رانچی، 24 دسمبر (ہ س)۔

بہار کے کپتان ثاقب الغنی نے وجے ہزارے ٹرافی کے پلیٹ گروپ میچ میں تاریخ رقم کی۔ وہ اروناچل پردیش کے خلاف صرف 32 گیندوں میں سنچری بنا کر لسٹ اے کرکٹ میں سنچری بنانے والے تیز ترین ہندوستانی بلے باز بن گئے۔

جے ایس سی اے اوول گراو¿نڈ میں کھیلے گئے اس میچ میں غنی 40 گیندوں پر ناٹ آو¿ٹ 128 رنز بنا کر لوٹے۔ ان کی ریکارڈ ساز اننگز میں 10 چوکے اور 12 چھکے شامل تھے۔ اسی دن جھارکھنڈ کے وکٹ کیپر بلے باز ایشان کشن نے کرناٹک کے خلاف 33 گیندوں میں سنچری بنائی لیکن غنی ان سے ایک گیند قبل سنچری مکمل کر کے ریکارڈ کو حاصل کرنے میں کامیاب ہو گئے۔

دلچسپ بات یہ ہے کہ وجے ہزارے ٹرافی 2025-26 کے افتتاحی دن دو مختلف میدانوں — رانچی اور احمد آباد میں ہندوستانیوں کی طرف سے دو تیز ترین لسٹ اے سنچریاں دیکھنے میں آئیں۔

لسٹ اے کرکٹ میں دنیا کی تیز ترین سنچری آسٹریلیا کے جیک فریزر میک گرک کی ہے جنہوں نے 8 اکتوبر 2023 کو ایڈیلیڈ میں تسمانیہ کے خلاف 29 گیندوں پر اپنی سنچری مکمل کی۔

اس میچ میں بہار کی بلے بازی پوری طرح حاوی رہی۔ نوعمر ٹیلنٹ ویبھو سوریہ ونشی نے 84 گیندوں میں 190 رنز کی دھماکہ خیز اننگز کھیلی، لسٹ اے کرکٹ میں سب سے کم عمر سنچری بنانے والے بن گئے۔ آیوش لوہاروکا نے 56 گیندوں میں 116 رنز بنائے۔ کپتان غنی کی سنچری سے بہار نے مخالف گیند بازوں کو پچھاڑ دیا۔

بہار نے پہلے بلے بازی کرتے ہوئے 6 وکٹوں پر 574 رنز بنائے، جو لسٹ اے کرکٹ میں سب سے زیادہ مجموعی اسکور ہے۔ اس سے پہلے یہ ریکارڈ 2022 میں اسی ٹورنامنٹ میں تمل ناڈو (506/2 بمقابلہ اروناچل پردیش) کے پاس تھا۔ بہار کی اننگز میں کل 49 چوکے اور 38 چھکے شامل تھے۔

لسٹ اے کرکٹ میں ہندوستانیوں کی تیز ترین سنچریاں

ثاقب الغنی – 32 گیندیں، بہار بمقابلہ اروناچل پردیش (24 دسمبر 2025)

ایشان کشن – 33 گیندیں، جھارکھنڈ بمقابلہ کرناٹک (24 دسمبر 2025)

انمول پریت سنگھ – 35 گیندیں، پنجاب بمقابلہ اروناچل پردیش (21 دسمبر، 2024)

ویبھو سوریہ ونشی – 36 گیندیں، بہار بمقابلہ اروناچل پردیش (24 دسمبر 2025)

یوسف پٹھان – 40 گیندیں، بڑودہ بمقابلہ مہاراشٹر (16 فروری 2010)۔

ہندوستھان سماچار

ہندوستان سماچار / عطاءاللہ