جموں, 24 دسمبر (ہ س)۔ جموں میونسپل کارپوریشن نے اپنے فلیگ شپ پروگرام ’وال آف شیم‘ کے تحت عوامی مقامات پر گندگی پھیلانے اور کھلے میں پیشاب جیسی غیر صحت بخش عادات کی روک تھام کے لیے اپنی مہم میں مزید تیزی لا دی ہے۔ اس اقدام کا مقصد شہریوں میں سماجی شعور بیدار کرنا اور مثبت رویّوں کو فروغ دینا ہے۔

اس سلسلے میں بدھ کے روز جے ایم سی نے پنج بختار روڈ پر ایک جامع صفائی و بیداری مہم چلائی، جو ایک مندر کے سامنے واقع ہے۔ یہ علاقہ پہلے کوڑا کرکٹ پھینکنے اور کھلے میں پیشاب کے باعث حساس مقام کے طور پر نشان زد کیا گیا تھا، جس سے مقامی باشندوں کو مشکلات کا سامنا تھا اور بالخصوص مذہبی مقام کے اطراف صفائی و صحت عامہ سے متعلق سنگین خدشات پیدا ہو رہے تھے۔

صفائی مہم کے دوران کمشنر جموں میونسپل کارپوریشن ڈاکٹر دیونش یادو نے مقامی باشندوں اور دکانداروں سے بات چیت کی اور شہری شعور، صفائی اور اجتماعی ذمہ داری کی اہمیت پر زور دیا۔ انہوں نے عوام سے اپیل کی کہ وہ غیر صحت بخش سرگرمیوں سے گریز کریں اور شہر کو صاف، باوقار اور صحت مند رکھنے کے لیے جے ایم سی کے ساتھ بھرپور تعاون کریں۔

ڈاکٹر دیونش یادو نے کہا کہ دیرپا صفائی کے اہداف حاصل کرنے کے لیے مسلسل عوامی بیداری کے ساتھ سخت نفاذ بھی ناگزیر ہے۔ انہوں نے شہریوں کو تلقین کی کہ وہ شہر کی صفائی کے تحفظ میں فعال شراکت دار بنیں۔

مہم کے دوران مقامی لوگوں کے ساتھ تفصیلی تبادلۂ خیال کیا گیا اور انہیں گندگی پھیلانے اور کھلے میں پیشاب کے مضر اثرات، صحت عامہ، ماحولیاتی صفائی اور شہر کے حسن پر پڑنے والے منفی اثرات سے آگاہ کیا گیا۔ شہریوں پر زور دیا گیا کہ وہ اپنے محلوں میں درست طریقے سے کچرا ٹھکانے لگانے کے لیے دوسروں کو ترغیب دے کر ’صفائی کے سفیر‘ کا کردار ادا کریں۔

علاقے میں نمایاں اور نفسیاتی تبدیلی لانے کے لیے ’وال آف شیم‘ اقدام کے تحت دیواروں پر پینٹنگز اور آگاہی پر مبنی فن پارے بھی تخلیق کیے گئے، جن کا مقصد عوامی مقامات کی بے حرمتی روکنا اور صفائی، شہری فخر اور مذہبی و سماجی مقامات کے احترام کا شعور اجاگر کرنا ہے۔

ہندوستھان سماچار

---------------

ہندوستان سماچار / محمد اصغر