عمان اور ہندوستان آج آزاد تجارتی معاہدے پر دستخط کریں گے، وزیر اعظم مودی مسقط پہنچے

مسقط، 18 دسمبر (ہ س)۔ ہندوستان کے وزیر اعظم نریندر مودی 3 ملکوں کے دورے کے آخری مرحلے میں عمان کی راجدھانی مسقط پہنچ چکے ہیں۔ وہ دو دن قیام کریں گے۔ اس دوران عمان کی اعلیٰ قیادت سے بات چیت کریں گے۔ وزیر اعظم مودی کی موجودگی میں آج دونوں ملکوں کے درمیان آزادانہ تجارتی معاہدے (ایف ٹی اے) پر دستخط ہوں گے۔ بدھ کو مسقط پہنچنے پر وزیر اعظم مودی کا ہوٹل میں ہندوستانی نژاد لوگوں نے پرتپاک استقبال کیا۔

وزیر اعظم نریندر مودی نے مسقط پہنچنے پر یادگار لمحات اپنے سرکاری ایکس ہینڈل پر شیئر کیے ہیں۔ یاد رہے ہندوستان اور عمان کے درمیان آزاد تجارتی معاہدے کو گزشتہ جمعہ کو مرکزی کابینہ نے منظوری دی تھی۔ جامع اقتصادی شراکت داری معاہدہ (سی ای پی اے) کے طور پر سرکاری طور پر نامزد اس معاہدے کے لیے بات چیت نومبر 2023 میں باضابطہ طور پر شروع ہوئی تھی۔ آخری بات چیت اس سال پوری ہوئی۔ وزیر اعظم مودی عمان میں سلطان طارق کے ساتھ گفتگو کریں گے۔ وہ تارکین وطن ہندوستانیوں کے اجتماع سے بھی خطاب کریں گے۔

مسقط پہنچنے پر ہوائی اڈے پر وزیر اعظم مودی کا عمان کے نائب وزیر اعظم سید شہاب بن طارق السعید نے گرم جوشی سے استقبال کیا۔ وزیر اعظم کو گارڈ آف آنر دیا گیا۔ مودی سلطان ہیثم بن طارق کی دعوت پر عمان پہنچے ہیں۔ خلیجی ملک کا یہ ان کا دوسرا دورہ ہے۔ ساتھ ہی ہندوستان-عمان کے درمیان سفارتی تعلقات کے قیام کے 70 سال پورے ہونے کی علامت ہے۔

وزیر اعظم مودی نے ایکس پر لکھا، ”مسقط ایئرپورٹ پر گرم جوشی سے استقبال کے لیے عمان کے نائب وزیر اعظم (دفاعی امور) سید شہاب بن طارق السعید کا بہت بہت شکریہ۔ ہماری بہت اچھی بات چیت بھی ہوئی، جس میں ہم نے ہندوستان-عمان دوستی پر اپنے خیالات شیئر کیے۔“ وزیر اعظم مودی اردن اور ایتھوپیا کا کامیاب دورہ پورا کرنے کے بعد عمان پہنچے۔

وزیر اعظم مودی نے ایکس پر ایک پیغام میں دونوں ملکوں کے درمیان مستقل تعلقات پر روشنی ڈالی۔ انہوں نے کہا، ”مسقط، عمان میں اترا۔ یہ ہندوستان کے ساتھ مستقل دوستی اور گہرے تاریخی تعلقات کی سرزمین ہے۔ یہ دورہ تعاون کے نئے راستے تلاش کرنے اور ہماری شراکت داری کو نئی رفتار دینے کا موقع فراہم کرتا ہے۔“ وزیر اعظم نے کہا کہ عمان میں ملے گرم جوشی بھرے استقبال کے لیے شکر گزار ہوں۔ یہاں ہندوستانی کمیونٹی کا پیار اور جوش ہندوستان اور عمان کے درمیان لوگوں کے درمیان مضبوط رشتوں کو سچ میں دکھاتا ہے۔

ہندوستھان سماچار

---------------

ہندوستان سماچار / انظر حسن