بھوپال، 15 دسمبر (ہ س)۔ مدھیہ پردیش میں موسم سرما مزید شدید ہوتا جا رہا ہے۔ شدید سردی کے درمیان ریاست کے کئی علاقوں میں اب گھنی دھند شروع ہوگئی ہے۔ محکمہ موسمیات نے آج پیر کو گوالیار، چمبل، ساگر، جبل پور اور ریوا ڈویژن کے 14 اضلاع میں دھند کا الرٹ جاری کیا ہے۔ گوالیار-چمبل کے علاقے میں حد نگاہ خاص طور پر کم رہنے کی توقع ہے۔ اس سے قبل گزشتہ اتوار کو بھی ریاست کے شمالی علاقوں میں دھند چھائی رہی تھی۔ دریں اثنا، ریاست کا واحد ہل اسٹیشن پچمڑھی ایک بار پھر سب سے سرد رہا جہاں کم از کم درجہ حرارت 5.2 ڈگری سیلسیس رہا۔

محکمہ موسمیات کے مطابق، گوالیار، مورینا، بھنڈ، دتیا، نیواری، ٹیکم گڑھ، چھتر پور، پنا، ستنا، میہر، ریوا، موگنج، سدھی اور سنگرولی میں پیر کو گھنی دھند چھائے رہنے کا امکان ہے۔ ماہرین موسمیات کے مطابق 17 دسمبر کی رات سے ایک نئی ویسٹرن ڈسٹربنس مغربی ہمالیائی خطہ کو متاثر کرے گی۔ اس کے اثرات اگلے دو تین دنوں میں مدھیہ پردیش میں بھی محسوس کیے جائیں گے جس سے سردی کی شدت میں ایک بار پھر اضافہ ہوسکتا ہے۔

ہفتہ اور اتوار کی رات کو ریاست کے بیشتر شہروں میں کم سے کم درجہ حرارت 10 ڈگری سے نیچے رہا۔ پانچ بڑے شہروں میں اندور سب سے سرد رہا جہاں پارہ 6.4 ڈگری سیلسیس تک پہنچ گیا۔ راجدھانی بھوپال میں 7 ڈگری سیلسیس، جبل پور میں 9.4 ڈگری سیلسیس اور گوالیار اور اجین میں 9.8 ڈگری سیلسیس درج کیا گیا۔ سردی کے اثرات دیگر علاقوں میں بھی واضح نظر آئے۔ راج گڑھ کلیان پور میں درجہ حرارت 5.6 ڈگری سیلسیس، شاجاپور میں 6.1 ڈگری سیلسیس، مندسور میں 6.7 ڈگری سیلسیس اور ریوا-امریا میں 7.2 ڈگری سیلسیس تھا۔

محکمہ موسمیات نے اطلاع دی ہے کہ شمالی ہندوستان کے میدانی علاقوں میں فعال جیٹ اسٹریم مدھیہ پردیش کو بھی متاثر کر رہی ہے۔ یہ جیٹ اسٹریم زمین سے تقریباً 12.6 کلومیٹر کی بلندی پر 176 کلومیٹر فی گھنٹہ کی رفتار سے بہہ رہی ہے، جس کی وجہ سے مدھیہ پردیش میں سردی اور دھند چھائی ہوئی ہے۔

ہندوستھان سماچار

---------------

ہندوستان سماچار / عبدالواحد