نئی دہلی، 25 نومبر (ہ س)۔ مرکزی وزیر تجارت و صنعت پیوش گوئل نے منگل کو کہا کہ ان کی وزارت نے جن وشواس بل کے تیسرے ورژن کے ذریعے چھوٹے کاروباری جرائم کو مزید مجرمانہ سرگرمیوں سے پاک کرنے کے لیے کام شروع کر دیا ہے۔ انہوں نے کہا کہ مرکزی حکومت کاروبار کرنے میں آسانی کو مضبوط بنانے اور کارکنوں کی فلاح و بہبود کو یقینی بنانے کے لیے پرعزم ہے۔

مرکزی وزیر تجارت و صنعت نے یہ بیان آج نئی دہلی میں این ڈی ایم سی کنونشن سینٹر میں کنفیڈریشن آف آل انڈیا ٹریڈرس (سی اے آئی ٹی) کی قومی تجارتی کانفرنس سے خطاب کرتے ہوئے دیا۔ انہوں نے کہا کہ ان کی وزارت نے پہلے ہی تقریباً 275-300 ایسے دفعات کی نشاندہی کی ہے جنہیں جرائم سے پاک کی کٹیگری میں رکھا جا سکتا ہے۔ گوئل نے مشورہ دیا کہ کاروباری برادری مزید دفعات کی نشاندہی کرکے ان کے بارے میں وزارت کو مطلع کرے۔

تاجروں کی ایک کانفرنس سے خطاب کرتے ہوئے انہوں نے گرو تیغ بہادر کی قربانی کو یاد کیا، جن کی وراثت کو تقریباً 350 سال بعد یاد کیا جا رہا ہے۔ انہوں نے کہا کہ ان کے نظریات پر عمل کرنے سے ملک کو فخر اور عزت ملے گی اور روشن مستقبل کو یقینی بنایا جائے گا۔ انہوں نے کہا کہ گرو تیغ بہادر نے جس وژن کے ساتھ ملک کو متحد کیا، اسے یاد رکھنا ہندوستان کی ترقی کی رہنمائی کرتا رہے گا۔ لیبر کوڈ کے نفاذ کے بارے میں، انہوں نے کہا کہ اس میں مزدور دوست اقدامات جیسے کہ بروقت کم از کم اجرت اور سبھی کے لیے سماجی تحفظ، بشمول مختلف ای -کامرس پلیٹ فارمز کے لیے کام کرنے والے گِگ ورکرز شامل ہیں ۔ انہوں نے کہا کہ لیبر کوڈ کاروبار کرنے میں آسانی کو فروغ دے گا۔

انہوں نے کاروباری اداروں کوسو دیشی مصنوعات کو فروغ دینے کی ترغیب دی۔ گوئل نے کہا کہ سپلائرز کو مصنوعات کی پیکیجنگ پر مینوفیکچرنگ کی جگہ کو واضح طور پر بتانا چاہیے اور مشورہ دیا کہ دکانیں یہ ظاہر کر سکتی ہیں کہ وہ سودیشی سامان فروخت کرتے ہیں۔ انہوں نے ’’میڈ ان انڈیا‘‘ مصنوعات کی موجودگی کو بڑھانے کی اہمیت پر زور دیا۔

اگست میں لوک سبھا میں پیش کیا گیا جن وشواس (ترمیمی دفعات) بل کو سلیکٹ کمیٹی کے پاس بھیج دیا گیا۔ اس قانون کا پہلا ورژن 2023 میں نافذ کیا گیا تھا۔ اس نے 42 ایکٹ کی 183 دفعات میں ترمیم کرکے معمولی جرائم کو جرائم سے پاک کیا گیا تھا۔

ہندوستھان سماچار

ہندوستان سماچار / محمد شہزاد