ممبئی،

16 نومبر (ہ س)۔ مہاراشٹر حکومت نے بالا صاحب ٹھاکرے نیشنل میموریل پبلک ٹرسٹ کے

ڈھانچے میں بڑی تبدیلی کرتے ہوئے ادھو ٹھاکرے کو دوبارہ ٹرسٹ کا چیئرمین مقرر کر دیا

ہے۔ نئی نامزدگیوں سے گویا ٹرسٹ کی بااختیار گورننگ باڈی کو ازسرنو ترتیب دیا گیا

ہے، جو شیوسینا کے بانی آنجہانی بالاصاحب ٹھاکرے کی یادگار کی تعمیر اور انتظام کے

لیے ذمہ دار ہے۔

سرکاری

قرارداد کے مطابق، گورننگ باڈی میں گیارہ ارکان شامل ہوں گے جن کی مدت کار مختلف

رکھی گئی ہے۔ ادھو بالاصاحب ٹھاکرے کی پانچ سالہ تقرری کے ساتھ، سابق وزیر سبھاش

راجارام دیسائی کو ٹرسٹ کا سیکریٹری بنایا گیا ہے، جبکہ سابق وزیر آدتیہ ادھو

ٹھاکرے بھی اگلے پانچ برس رکن کے طور پر شامل رہیں گے۔ بی جے پی کے ایم ایل اے

پراگ الاوانی اور سابق ایم ایل اے ششیر شندے کو تین سال کے لیے رکن مقرر کیا گیا

ہے۔

اس نئی

تشکیل میں حکومت کے چار اعلیٰ عہدیدار بھی شامل کیے گئے ہیں: چیف سکریٹری، شہری

ترقی ڈویژن 2 کے پرنسپل سکریٹری، محکمہ قانون و انصاف کے پرنسپل سکریٹری، اور بی ایم

سی کمشنر۔ گورننگ باڈی کی تکمیل کے لیے جنرل ٹرسٹ کی رکنیت میں سے مزید دو اراکین

منتخب کیے جائیں گے۔

یہ تبدیلی

شندے دھڑے کے اعتراضات کے باوجود لائی گئی ہے، جس نے مطالبہ کیا تھا کہ ادھو

ٹھاکرے کو ٹرسٹ سے دور رکھا جائے۔ شندے گروپ کے رہنما رام داس کدم نے دلیل دی تھی

کہ ٹھاکرے کو اس یادگار سے کوئی تعلق نہیں رہنا چاہیے۔ تاہم، حکومت نے وضاحت کی کہ

ادھو ٹھاکرے نے 25 نومبر 2019 کو چیئرمین شپ سے استعفیٰ دیا تھا اور موجودہ گورننگ

باڈی کی مدت 11 مارچ 2025 کو ختم ہو چکی تھی، اس لیے تنظیم نو ضروری تھی۔

حکومت

نے سیکریٹری سبھاش راجا رام دیسائی کو ہدایت کی ہے کہ ٹرسٹ کے سرکاری ریکارڈ کو اپ

ڈیٹ کرنے کے لیے چیریٹی کمشنر کے سامنے درخواست دائر کریں۔ اس کے ساتھ ہی ٹرسٹ کو

ممبئی پبلک ٹرسٹ ایکٹ 1950 اور کوآپریٹو سوسائٹیز رجسٹریشن ایکٹ 1960 کے تحت اپنے

رجسٹریشن میں بھی ضروری اصلاحات کرنا ہوں گی۔ آئندہ تمام امور ٹرسٹ کے میمورنڈم آف

ایسوسی ایشن اور اس کے قواعد و ضوابط کے مطابق انجام پائیں گے۔

شیواجی

پارک، دادر میں میئر بنگلے کے احاطے میں تعمیر ہونے والی قومی یادگار کی رفتار میں

تیزی آئی ہے اور یہ توقع بڑھ گئی ہے کہ نئی گورننگ باڈی منصوبے کو مؤثر سمت دے گی۔

امکان ہے کہ یہ یادگار آئندہ سال عوام کے لیے کھول دی جائے گی۔ ٹرسٹ کی پہلی تشکیل

27 ستمبر 2016 کو عمل میں آئی تھی، جبکہ تازہ حکومتی قرارداد مورخہ 15 نومبر 2025

کو جاری کی گئی ہے اور اس کی منظوری گورنر مہاراشٹر نے ڈیجیٹل دستخط کے ساتھ دی

ہے۔

ہندوستھان

سماچار

ہندوستان سماچار / جاوید این اے