نئی دہلی، 9 اکتوبر (ہ س)۔

مرکزی وزیر داخلہ امت شاہ نے جمعرات کو کہا کہ موسم سرما قریب ہے اور دہشت گرد برف باری کا فائدہ اٹھا کر دراندازی کی کوشش کر سکتے ہیں، اس لیے سیکورٹی فورسز کو کسی بھی صورت حال سے نمٹنے کے لیے پوری طرح تیار رہنا چاہیے۔

امت شاہ نے یہاں جموں و کشمیر میں سیکورٹی صورتحال پر ایک اعلیٰ سطحی جائزہ میٹنگ کی صدارت کی۔ انہوں نے دہشت گردی سے پاک جموں و کشمیر کے ہدف کو حاصل کرنے کے لیے وزیر اعظم نریندر مودی کی قیادت میں مرکزی حکومت کے اٹل عزم کا اعادہ کیا۔ انہوں نے کہا کہ سیکورٹی ایجنسیوں کی ٹھوس اور مربوط کوششوں کی بدولت جموں و کشمیر میں دشمن ممالک کی سرپرستی میں دہشت گرد نیٹ ورک کا اب عملی طور پر خاتمہ ہو چکا ہے۔

انہوں نے کہا کہ ہماری سیکورٹی فورسز کو جموں و کشمیر کے امن و سلامتی کو خطرے میں ڈالنے کی کسی بھی کوشش کو ناکام بنانے کی مکمل آزادی ہے۔ حکومت دہشت گردی کو جڑ سے اکھاڑ پھینکنے کے لیے ہر ممکن اقدامات کر رہی ہے۔

وزیر داخلہ نے پہلگام دہشت گردانہ حملے کے بعد مرکز کے زیر انتظام علاقے کی انتظامیہ اور سیکورٹی ایجنسیوں کی طرف سے کی گئی تیز رفتار کارروائی کی تعریف کی۔ انہوں نے کہا کہ ان کارروائیوں سے جموں و کشمیر میں سیکورٹی کے نظام کو مزید تقویت ملی ہے اور دہشت گردی کی کسی بھی نئی سازش کو ناکام بنانے میں مدد ملی ہے۔

امت شاہ نے کہا کہ دہشت گردی کے خلاف جاری کارروائیوں میں تمام سیکورٹی ایجنسیوں کے درمیان تال میل بہت ضروری ہے۔ انہوں نے ہدایت کی کہ مشترکہ آپریشنز کے دوران انٹیلی جنس شیئرنگ اور کوآرڈینیشن کو مزید مضبوط کیا جائے تاکہ کسی بھی ممکنہ خطرات کو بروقت ناکام بنایا جا سکے۔

وزیر داخلہ نے خاص طور پر نوٹ کیا کہ موسم سرما کے قریب آتے ہی دہشت گرد برف باری اور کم نمائش کا فائدہ اٹھاتے ہوئے سرحد پار سے دراندازی کی کوشش کر سکتے ہیں۔ انہوں نے کہا کہ ہماری سیکورٹی فورسز کو ہر موسم اور ہر طرح کے حالات میں تیار رہنا چاہیے تاکہ اس بات کو یقینی بنایا جا سکے کہ کوئی دہشت گرد عناصر ہمارے سرحدی علاقوں میں داخل نہ ہو سکیں۔ انہوں نے زور دے کر کہا کہ سرحد پار سے دہشت گردی کی کسی بھی کوشش کا بھرپور جواب دیا جائے گا۔ انہوں نے کہا، ”ہمارا مقصد جموں و کشمیر میں امن و استحکام کو برقرار رکھنا ہے، تاکہ یہاں کے لوگوں کو ترقی اور معمول کی زندگی سے پوری طرح مستفید ہو سکیں“۔

امت شاہ نے کہا کہ جموں و کشمیر کے لوگوں کی امنگوں کو پورا کرنا مرکزی حکومت کی اولین ترجیح ہے۔ مودی حکومت نے جموں و کشمیر کی ہمہ جہت ترقی کے لیے بے مثال اقدامات کیے ہیں۔ دہشت گردی کا خاتمہ اور ترقی کو وسعت دینا دونوں ہماری حکمت عملی کے لیے لازم و ملزوم ہیں۔ انہوں نے حکام کو دہشت گردی اور علیحدگی پسندی کے خلاف سخت کارروائی کے ساتھ ساتھ ترقیاتی منصوبوں کو تیز کرنے کی ہدایت کی تاکہ خطے کے نوجوانوں کو روزگار اور مواقع فراہم کیے جائیں اور انہیں گمراہ ہونے سے بچایا جا سکے۔

ہندوستھان سماچار

ہندوستان سماچار / عطاءاللہ