نئی دہلی، 6 اکتوبر (ہ س)۔ دہلی پولیس کی کرائم برانچ نے دہلی میں سرگرم بدنام زمانہ گینگسٹر ہمانشو عرف بھاو کے کرائم سنڈیکیٹ کاخاتمہ کر دیا ہے اور 10 ملزمان کو گرفتار کیا ہے۔ ان کے خلاف چارج شیٹ بھی داخل کی گئی ہے۔ گینگ لیڈر ہمانشو عرف بھاو اور اس کے ساتھی ساحل کو عدالت نے اشتہاری مجرم قرار دیا ہے۔ پولیس نے ان کے خلاف غیر حاضری میں مقدمہ چلانے کے لیے عدالت میں درخواست بھی دائر کی ہے۔

کرائم برانچ کے جوائنٹ پولیس کمشنر سریندر کمار نے پیر کو بتایا کہ گینگ لیڈر ہمانشو عرف بھاو ہندوستان سے فرار ہوکر بیرون ملک کسی نامعلوم مقام سے گینگ کو چلا رہا تھا۔ وہ جعلی پاسپورٹ کے ذریعے پرتگال کے راستے بیرون ملک فرار ہوا تھا۔ پولیس اب اس کے ٹھکانے کا پتہ لگانے کی کوشش کر رہی ہے۔

جوائنٹ پولیس کمشنر نے کہا کہ 06 مئی 2024 کی شام کو دہلی کے تلک نگر تھانہ علاقے میں فائرنگ کا واقعہ پیش آیا۔ تین حملہ آوروں نے فیوژن کار شوروم میں اندھا دھند فائرنگ کرکے دہشت پھیلا دی تھی، تاکہ تاجر برادری میں ان کے گینگ لیڈر ہمانشو بھاو کا خوف برقرار رہے۔ اس واقعے میں چھ بے گناہ لوگ زخمی ہوئے تھے۔

شو روم کے مالک منوج ملک کی شکایت پر پولیس نے ایف آئی آر درج کی۔ اگلے دن، شکایت کنندہ کو انٹرنیشنل وائس میل کے ذریعے ایک دھمکی آمیز کال موصول ہوئی، جس میں ہمانشو بھاو، کال کرنے والے کے طور پر، 5 کروڑ روپے کے تاوان کا مطالبہ کیا۔ معاملے کی سنگینی کو دیکھتے ہوئے تفتیش کرائم برانچ کو منتقل کر دی گئی۔

پولیس کے جوائنٹ کمشنر نے بتایا کہ تحقیقات سے پتہ چلا ہے کہ ہمانشو بھاو کا گینگ 2020 سے جبری وصولی، اغوا اور قتل جیسے جرائم میں ملوث تھا۔ اس نے تاجروں، پراپرٹی ڈیلروں اور بااثر افراد کو نشانہ بنایا۔ جرائم کے اس سلسلے کو دیکھتے ہوئے، مہاراشٹر کنٹرول آف آرگنائزڈ کرائم ایکٹ (مکوکا) کی دفعہ 3 اور 4 کو بھی کیس میں شامل کیا گیا۔

ہندوستھان سماچار

ہندوستان سماچار / محمد شہزاد