آگرہ، 26 اکتوبر (ہ س)۔ اتر پردیش کے آگرہ ضلع کے نبوہرا تھانے کی ایک پولیس ٹیم لاپتہ شخص کے معاملے میں چھاپہ مار کر راجستھان سے واپس آرہی تھی۔ آگرہ-جے پور ہائی وے پر ٹیم کی پرائیویٹ کار ٹرک سے ٹکرا جانے سے ڈرائیور اور ہیڈ کانسٹیبل کی موت ہو گئی۔ ٹیم کے سب انسپکٹر گورو کمار اور متاثرہ خاندان کے ارکان سمیت پانچ افراد شدید زخمی ہو گئے۔

اتوار کی صبح تقریباً 6 بجے آگرہ کے فتح پور سیکری تھانہ علاقے کے تحت چومنشاہ پور گاؤں میں ریلائنس پٹرول پمپ کے قریب جے پور ہائی وے پر کھڑے ٹرک سے ایک کار ٹکرا گئی۔ ٹکر اتنی شدید تھی کہ کار بری طرح تباہ ہو گئی جس سے جائے وقوعہ پر کہرام مچ گیا۔ اس حادثے میں ہیڈ کانسٹیبل گورو پرتاپ سنگھ اور ڈرائیور دیو ولد منگل سنگھ کی موت ہو گئی۔ سب انسپکٹر گورو کمار سمیت پانچ دیگر زخمی ہوئے۔ انہیں فوری طور پر اسپتال منتقل کیا گیا۔ پولیس ضروری قانونی کارروائی کر رہی ہے۔

حال ہی میں آگرہ کے نبوہرہ تھانے سے لاپتہ خاتون کے معاملے میں پولیس اس کا سراغ لگانے کے لیے ایک نجی ارٹیگا کار میں راجستھان کے سورت گڑھ گئی تھی اور چھاپے کے بعد آگرہ واپس آ رہی تھی۔

ایس ایچ او فتح پور سیکری آنند ویر سنگھ نے بتایا کہ نبوہرہ پولیس اسٹیشن میں تعینات چیف کانسٹیبل گورو پرتاپ سنگھ کی اس واقعہ میں موت ہوگئی۔ اسی اسٹیشن کے سب انسپکٹر گورو کمار سمیت پانچ دیگر زخمی ہوئے۔ انہیں علاج کے لیے آگرہ کے ایس این میڈیکل کالج بھیج دیا گیا ہے۔ پولیس نے مقدمہ درج کر کے قانونی کارروائی شروع کر دی ہے۔

---------------

ہندوستان سماچار / عبدالسلام صدیقی