جموں، 18 اکتوبر (ہ س)۔ جموں میں دن دہاڑے پیش آنے والی ایک بڑی چوری کی واردات میں نامعلوم چوروں نے درگا نگر سیکٹر-1 میں واقع اشوک کمار کے رہائشی مکان سے دو سو گرام سونا اور نقد 5 لاکھ روپے چُرا لیے۔

پولیس کے مطابق، واردات اُس وقت انجام دی گئی جب گھر کے تمام افراد باہر گئے ہوئے تھے۔ ابتدائی تحقیقات سے معلوم ہوا ہے کہ چوروں نے گھر میں داخل ہونے کے لیے اے سی کی کھڑکی توڑ کر اندر رسائی حاصل کی۔

واقعے کی اطلاع ملنے پر پولیس چوکی چنور میں ایف آئی آر درج کر لی گئی اور پولیس ٹیم نے موقع پر پہنچ کر شواہد اکٹھے کیے۔ متعدد مشتبہ افراد کو حراست میں لے کر ان سے تفصیلی پوچھ گچھ کی جا رہی ہے۔

پولیس حکام کا کہنا ہے کہ معاملے کی سنجیدگی سے تحقیقات جاری ہیں اور ملوث افراد کو جلد قانون کے کٹہرے میں لایا جائے گا۔

ہندوستھان سماچار

---------------

ہندوستان سماچار / محمد اصغر