نئی دہلی، 17 اکتوبر (ہ س): مرکزی خزانہ اور کارپوریٹ امور کی وزیر نرملا سیتا رمن نے جمعرات کو کرناٹک کے بیلاری میں کرناٹک گرامین بینک کی کاروباری کارکردگی کے جائزہ اجلاس کی صدارت کی۔ انہوں نے بینک کو نصیحت کی کہ وہ معیشت کے ابھرتے ہوئے شعبوں پر خصوصی توجہ کے ساتھ نچلی سطح پر زرعی قرضوں کی تقسیم میں اپنا حصہ بڑھائے۔ سیتا رمن نے تمام اسٹیک ہولڈرز کو بھی ہدایت دی کہ وہ خطے میں متعلقہ زرعی سرگرمیوں کی صلاحیت کو بروئے کار لانے کے لیے ضروری اقدامات کریں۔

ڈی ایف ایس سکریٹری ایم ناگاراجو، نابارڈ کے چیئرمین شاجی کے وی، کینرا بینک کے ایگزیکٹیو ڈائرکٹر، اور مالیاتی خدمات کے محکمے کے دیگر سینئر عہدیداروں کی موجودگی میں، وزیر خزانہ نے قرض کی تقسیم میں اضافہ، این پی اے، مالی شمولیت کے تحت کارکردگی، اور کے اے جی بی کی حکومتی اسکیم کے نفاذ سمیت اہم اشاریوں کا جائزہ لیا۔ کرناٹک گرامین بینک اور کینرا بینک کو ہدایت دی گئی ہے کہ وہ ریاستی حکومت کے محکموں کے ساتھ مل کر کام کریں تاکہ قرض کی تقسیم کو بڑھایا جائے، خاص طور پر ایم ایس ایم ای اور اس سے منسلک شعبوں کو تعاون فراہم کیا جائے۔

سیتارمن نے دیہی بینکوں پر زور دیا کہ وہ نیم شہری اور دیہی علاقوں میں قرض کی ضروریات کو پورا کرنے کے لیے اس موقع کا فائدہ اٹھائیں۔ مرکزی وزیر نے کہا کہ کچھ ایف پی او کی سرمایہ کی ضروریات ترقیاتی مالیاتی اداروں اور سرکاری محکموں سے پوری ہوتی ہیں۔ ورکنگ کیپیٹل کی ضروریات بینکوں سے پوری کی جانی چاہئیں۔ انہوں نے یہ بھی کہا کہ دیہی بینکوں کو اپنی مصنوعات اور خدمات کو کسان پروڈیوسر تنظیموں کی سہولت اور مطالبہ کے مطابق اپ گریڈ کرنا چاہیے۔ یہ بینکوں اور ایف پی اوز کو اپنے وسائل کو باہمی فائدے اور دیہی معیشت کی پائیدار ترقی کے لیے استعمال کرنے کے قابل بنائے گا۔

ہندوستھان سماچار

---------------

ہندوستان سماچار / عبدالواحد