قبل از انتخابات بریفنگ میں ماڈل ضابطہ اخلاق، انتخابی اخراجات کی نگرانی، شفافیت اور احتساب پر زور۔

نئی دہلی، 8 جنوری (ہ س)۔ دہلی اسمبلی انتخابات-2025 کے اعلان کے بعد، دہلی کے چیف الیکٹورل آفیسر (سی ای او) آر۔ ایلس واز نے بدھ کو قومی اور ریاستی سطح پر تسلیم شدہ سیاسی جماعتوں کے نمائندوں کے ساتھ میٹنگ کی۔ اجلاس کا مقصد پارٹیوں کو آزادانہ، منصفانہ اور شفاف انتخابات کو یقینی بنانے کے لیے ماڈل کوڈ آف کنڈکٹ (ایم سی سی) کے نفاذ اور انتخابی اخراجات کی نگرانی کے اقدامات سے آگاہ کرنا تھا۔

میٹنگ میں سی ای او نے ماڈل کوڈ آف کنڈکٹ پر عمل کرنے کی اہمیت پر زور دیا۔ یہ ضابطہ اخلاق انتخابی شیڈول کے اعلان کے فوراً بعد نافذ العمل ہو گیا۔ انہوں نے سیاسی مہمات، اخلاقی طریقوں اور انتخابی عمل میں خلل ڈالنے والی سرگرمیوں کی ممانعت کے لیے اہم رہنما اصولوں پر روشنی ڈالی۔

سی ای او نے انتخابی اخراجات کی نگرانی کے لیے اقدامات کا بھی خاکہ پیش کیا، جس میں اخراجات کے مبصرین کی تقرری، مانیٹرنگ ٹیمیں اور خلاف ورزیوں پر نظر رکھنے کے لیے کنٹرول رومز کا قیام شامل ہے۔ انہوں نے سیاسی جماعتوں پر زور دیا کہ وہ انتخابی مہم کے مالیات میں شفافیت کو برقرار رکھیں اور مقررہ مدت کے اندر اخراجات کی تفصیلات جمع کرائیں۔

میٹنگ میں سیاسی جماعتوں کے نمائندوں نے کھل کر اپنے سوالات اٹھائے اور چیف الیکٹورل آفیسر نے ان کے جوابات دیئے۔ کئی نمائندوں نے بھی ردعمل کا اظہار کیا۔ اس میٹنگ میں عام آدمی پارٹی (اے اے پی)، بہوجن سماج پارٹی (دہلی ریاست)، بھارتیہ جنتا پارٹی (دہلی پردیش)، کمیونسٹ پارٹی آف انڈیا (سی پی آئی) (مارکسسٹ)، انڈین نیشنل کانگریس (دہلی اسٹیٹ) اور نیشنل پیپلز پارٹی (دہلی ریاست) کے نمائندوں نے شرکت کی۔

---------------

ہندوستان سماچار / عبدالسلام صدیقی