جموں, 30 جنوری (ہ س). ایم اے اسٹیڈیم جموں میں روایتی بیٹنگ ریٹریٹ تقریب کے ساتھ چار روزہ یومِ جمہوریہ تقریبات کا شاندار اختتام ہوا۔لیفٹیننٹ گورنر منوج سنہا تقریب کے مہمانِ خصوصی تھے۔ اس موقع پر مسلح افواج اور جموں و کشمیر پولیس کے بریس بینڈ اور پائپ ڈرم بینڈز نے دلکش قومی نغمے پیش کیے، جبکہ ’اے میرے وطن کے لوگوں‘ سمیت دیگر مسحور کن دھنوں نے سامعین کو محظوظ کیا۔تقریب میں جموں و کشمیر پولیس اور سیکورٹی فورسز کے دستوں، پریڈ کمانڈر، ڈپٹی پریڈ کمانڈر، سابق فوجیوں، سول انتظامیہ کے افسران، این سی سی (لڑکے اور لڑکیاں) کے کیڈٹس، ثقافتی فنکاروں، خصوصی بچوں اور مختلف محکموں کی جھانکیوں کو ان کی شاندار کارکردگی پر لیفٹیننٹ گورنر کی جانب سے اعزازات سے نوازا گیا۔ محکمہ اطلاعات و تعلقات عامہ کے زیرِ اہتمام منعقدہ حب الوطنی کے نغمے گانے کے مقابلے کے فاتحین کو بھی انعامات دیے گئے۔تقریب کا اختتام معروف ملی نغمے ’سارے جہاں سے اچھا‘ کی دھن کے ساتھ ہوا، جس کے ساتھ ہی آسمان میں رنگا رنگ آتش بازی، روشنیوں کے دلکش نظارے اور شاندار ساؤنڈ اینڈ لائٹ ڈسپلے نے ماحول کو مزید پرجوش بنا دیا۔ بعد ازاں، قومی ترانے کی گونج کے ساتھ یہ یادگار تقریب اپنے اختتام کو پہنچی۔

ہندوستھان سماچار

---------------

ہندوستان سماچار / محمد اصغر