اندور، 15 جنوری (ہ س)۔ شہر کے اے بی روڈ پر واقع ہائی اسٹریٹ اپولو مال میں برانڈڈ کپڑوں کے شو روم ریئر ریبٹ میں منگل کی دیر رات اچانک آگ بھڑک اٹھی۔ بدھ کی صبح جب صفائی کارکن مال پہنچے تو انہیں واقعہ کا علم ہوا۔ اطلاع ملنے پر فائر بریگیڈ نے موقع پر پہنچ کر آگ پر قابو پالیا تاہم تب تک شوروم میں رکھے برانڈڈ کپڑے مکمل طور پر جل چکے تھے۔ شوروم ملازمین کے مطابق اس آگ میں شوروم میں رکھے تقریباً 2 کروڑ روپے مالیت کے کپڑے جل کر راکھ ہو گئے۔ ملازمین نے یہ بھی بتایا کہ شو روم میں صرف ایک دن پہلے ہی 30 لاکھ روپے کے نئے کپڑے آئے تھے۔

معلومات کے مطابق ہائی اسٹریٹ اپولو مال میں ریئر ریبٹ کے نام سے برانڈڈ کپڑوں کا شو روم تقریباً تین ماہ قبل ہی شروع کیا گیا تھا۔ بتایا جاتا ہے کہ دیر رات شوروم میں آگ بھڑک اٹھی لیکن کسی نے اس پر توجہ نہیں دی۔ صبح صفائی کے لیے پہنچے شوروم ملازمین نے دھواں دیکھا اور فوری طور پر فائر بریگیڈ کو اطلاع دی۔ تب تک شوروم میں رکھا سامان جل کر راکھ ہو گیا۔ اطلاع ملتے ہی فائر بریگیڈ موقع پر پہنچ گئی تاہم دھویں کی کثرت کے باعث فائر فائٹرز اندر نہیں جا سکے۔ دھواں نکالنے کے لیے شوروم کا شیشہ توڑنا پڑا۔ تقریباً ایک گھنٹے کی مشقت کے بعد آگ پر قابو پایا جا سکا۔

فائر کنٹرول روم سے موصول ہونے والی اطلاعات کے مطابق مال میں آگ بجھانے کے لیے فائر سسٹم نصب کیا گیا ہے تاہم آگ لگنے کے بعد یہ سسٹم ٹھیک طریقے سے کام نہیں کرسکا۔ آگ لگنے کی وجہ فی الحال معلوم نہیں ہوسکی ہے۔ شارٹ سرکٹ کے باعث آگ لگنے کا خدشہ ظاہر کیا جارہا ہے۔

ہندوستھان سماچار

---------------

ہندوستان سماچار / انظر حسن