نئی دہلی، 27 جولائی (ہ س)۔

تہاڑ جیل نمبر 9 میں تین قیدیوں نے قتل کے ملزم دو قیدیوں پر تیز دھار ہتھیاروں سے حملہ کر دیا۔ واقعے میں دونوں قیدی شدید زخمی ہوئے جنہیں اسپتال میں داخل کرایا گیا ہے۔ حملہ کرنے والے تین قیدیوں میں سے ایک کے بھائی کو چند سال قبل قتل کر دیا گیا تھا، جس میں وہی دو قیدی ملزم تھے۔ بتایا جا رہا ہے کہ قیدی نے دو ساتھیوں کے ساتھ مل کر اپنے بھائی کی موت کا بدلہ لینے کے لیے یہ حملہ کیا۔ جیل ذرائع کے مطابق لولی اور لاویش قتل کے الزام میں اس جیل میں بند ہیں۔ ان دونوں پر تہاڑ جیل میں بند لوکیش نامی قیدی کے بھائی کے قتل کا الزام ہے۔ ایسے میں لوکیش نے بدلہ لینے کے لیے اپنے دوستوں کے ساتھ مل کر لاویش اور لولی پر حملہ کر دیا۔ لولی اور لاویش نے سال 2020 میں ونے نامی شخص کا قتل کیا تھا، جس کے الزام میں وہ جیل میں ہیں۔ بعد میں ونے کا بھائی لوکیش بھی کسی معاملے میں گرفتار ہو کر تہاڑ جیل آیا اور تب سے وہ اپنے بھائی کی موت کا بدلہ لینے کا منصوبہ بنا رہا تھا۔ موقع ملتے ہی اس نے اپنے ساتھیوں ابھیشیک اور ہمانشو کے ساتھ مل کر حملہ کردیا۔ یہ واقعہ جمعہ کی شام کو پیش آیا۔ قابل ذکر ہے کہ تہاڑ جیل میں حملے کا یہ پہلا واقعہ نہیں ہے۔ رواں سال اپریل کے مہینے میں بھی جیل نمبر تین میں دو گینگز کے قیدی آپس میں لڑ پڑے تھے جس میں کل چار قیدی زخمی ہوئے تھے۔ واقعے میں قیدیوں پر تیز دھار ہتھیاروں کا استعمال کیا گیا۔

ہندوستھان سماچار

ہندوستان سماچار / عطاءاللہ