وزیر دفاع راج ناتھ نے کارگل کے جنگجووں کی بہادری کو یاد کیا

نئی دہلی، 26 جولائی (ہ س)۔ وزیر دفاع راج ناتھ سنگھ نے کارگل وجے دیوس کی 25ویں سالگرہ کے موقع پر آج صبح 1999 کی جنگ میں فوجیوں کی قربانی کو یاد کیا۔ انہوں نے ایکس ہینڈل پر لکھا، ’’آج کارگل وجے دیوس کی 25ویں برسی پر، ہم ان بہادر سپاہیوں کے بے مثال جذبے اور حوصلے کو یاد کرتے ہیں جو 1999 کی جنگ میں بہادری سے لڑے تھے۔ ان کی غیر متزلزل عزم، بہادری اور حب الوطنی نے اس بات کو یقینی بنایا کہ ہمارا ملک محفوظ رہے۔ ان کی خدمات اور قربانی ہر ہندوستانی اور ہماری آنے والی نسلوں کو متاثر کرتی رہے گی۔‘‘

قابل ذکر ہے کہ ہندوستانی فوج نے 26 جولائی 1999 کو کارگل جنگ جیت کر پاکستان کو چھکے چھڑا دیے تھے۔ یہ جنگ تقریباً دو ماہ تک لڑی گئی۔ ابتدا میں اسے پاکستان کی طرف سے دراندازی سمجھا گیا لیکن لائن آف کنٹرول پر سرچ آپریشن کے بعد پاکستان کی منصوبہ بند حکمت عملی سامنے آئی۔

بھارتی فوج کو احساس ہوا کہ حملے کی منصوبہ بندی بڑے پیمانے پر کی گئی ہے۔ اس کے بعد بھارتی حکومت نے ’’آپریشن وجے‘‘ شروع کیا اور کارگل کے علاقے میں فوج بھیج دی۔ اس جنگ نے ہندوستانی مسلح افواج کے غیر متزلزل عزم اور ناقابل تسخیر جذبے کا مظاہرہ کیا۔ کارگل کی جنگ پاکستان کے غلط عزائم کا منہ بولتا ثبوت ہے۔ اس جنگ میں بھارت نے اپنے بہت سے بہادر جانبازوں کو بھی کھو دیا اور ان کی عظیم قربانی ملک کے لیے ایک مثال بن گئی۔

ہندوستھان سماچار

ہندوستان سماچار / انظر حسن / محمد شہزاد