ملک مخالف سرگرمیوں میں ملوث دو افراد جیل منتقل
جموں، 27 دسمبر (ہ س)۔ جموں و کشمیر پولیس نے قوم مخالف سرگرمیوں کے خلاف کارروائی کرتے ہوئے دو افراد کو پبلک سیفٹی ایکٹ (پی ایس اے) کے تحت گرفتار کیا ہے۔پولیس کے مطابق کشتواڑ میں جعفر حسین بٹ ولد محمد اشرف بٹ ساکن ہنجلہ، کو ممنوعہ تنظیموں کی معاونت اور غیر قانونی سرگرمیوں میں ملوث ہونے پر گرفتار کر کے ضلع جیل کٹھوعہ منتقل کیا گیا۔ جعفر کی سرگرمیاں خطے کے امن و امان کے لیے خطرہ تھیں۔
اسی طرح کٹھوعہ پولیس نے لیاقت علی، ولد عبد المجید، ساکن لوہائی ملہار، کو قوم مخالف سرگرمیوں کے طویل ریکارڈ پر گرفتار کر کے کوٹ بلوال جیل جموں منتقل کیا۔ لیاقت علی پر ماضی میں کئی سنگین مقدمات درج ہیں، جن میں قتل کی کوشش، دہشت گرد عناصر کی معاونت، اور دیگر جرائم شامل ہیں۔ پولیس نے عوام سے اپیل کی ہے کہ قوم مخالف سرگرمیوں یا مشتبہ عناصر کی اطلاع دیں۔ اطلاع دہندگان کی شناخت کو خفیہ رکھا جائے گا۔
ہندوستھان سماچار
--------------
ہندوستان سماچار / محمد اصغر
