دھلائی (تریپورہ)، 22 دسمبر (ہ س)۔

مرکزی وزیر داخلہ اور کو آپریٹیو امت شاہ نے اتوار کو اپنے دو روزہ دورے کے دوسرے دن تریپورہ کے دھلائی ضلع میں 668 کروڑ روپے کے مختلف ترقیاتی پروجیکٹوں کا افتتاح اور سنگ بنیاد رکھا۔ اس موقع پر انہوں نے ہدوکلاو¿ پارہ برو بحالی کالونی میں برو ریانگ برادری کے لوگوں سے ملاقات کی اور ان کے گھروں کا بھی دورہ کیا اور ان سے بات چیت کی۔

یہاں سہکار سے سمریدھی پروگرام میں بات کرتے ہوئے مرکزی وزیر امت شاہ نے کہا کہ تریپورہ میں طویل عرصے تک اقتدار میں رہنے والوں نے برو ریانگ برادری کے مسائل کو کبھی نہیں سمجھا، لیکن وزیر اعظم نریندر مودی نے ان کے درد کو سمجھا اور انہیں دور کرنے کی کوشش کی۔ انہوں نے کہا کہ مودی حکومت نے 38 ہزار برو ریانگ لوگوں کی بازآبادکاری کی جو 25 سال سے انتہائی مشکل حالات میں زندگی گزار رہے تھے اور انہیں ایک بہتر زندگی فراہم کی۔ اس کے علاوہ ریاست میں امن کی بحالی کے لیے تین باغی گروپوں اور برو ریانگ کمیونٹی کے ساتھ چار تاریخی معاہدوں پر دستخط کیے ہیں۔

مرکزی وزیر شاہ نے کہا کہ جمہوریت میں یقین رکھنے والی حکومتیں ترقی کی راہ ہموار کرتی ہیں۔ انہوں نے کہا کہ برو ریانگ کمیونٹی کے لیے 900 کروڑ روپے کی اسکیمیں نہ صرف بنائی گئیں بلکہ نچلی سطح پر بھی لاگو کی گئیں۔

وزیر اعظم مودی نے اس کمیونٹی کو دوسرے ہندوستانی شہریوں کے برابر حقوق دے کر ان کی عزت میں اضافہ کیا۔ تریپورہ میں ترقی کی رفتار پر روشنی ڈالتے ہوئے شاہ نے کہا کہ پچھلی حکومتوں کے دوران صرف 2.5 فیصد لوگوں کو پینے کا پانی میسر تھا جب کہ آج 85 فیصد گھروں میں نل کا پانی ہے۔ ریاست میں اسکول چھوڑنے کی شرح 3 فیصد سے نیچے آگئی ہے اور داخلہ کی شرح 67 فیصد سے بڑھ کر 99.5 فیصد ہوگئی ہے۔ انہوں نے کہا کہ ان کے علاوہ ماں تریپور سندری کے عظیم الشان مندر کی تعمیر کا کام جاری ہے جس سے دنیا بھر سے آنے والے عقیدت مندوں کو درشن کرنا آسان ہو جائے گا۔ امت شاہ نے تریپورہ حکومت اور مرکزی حکومت کی کوششوں کو عوامی بہبود اور ترقی کے لیے وقف قرار دیا۔

ہندوستھان سماچار

ہندوستان سماچار / عطاءاللہ