نائب وزیر اعلیٰ نے غیر قانونی کانکنی کے متعلق اہم اجلاس منعقد کیا
جموں، 21 نومبر (ہ س)۔ جموں و کشمیر میں غیر قانونی کان کنی کے مسئلے پر قابو پانے کے لیے نائب وزیر اعلی سریندر کمار چودھری کی صدارت میں آج ایک اعلیٰ سطحی اجلاس منعقد ہوا۔ نائب وزیر اعلی نے غیر قانونی کان کنی کی سرگرمیوں کے خاتمے کے لیے سخت اقدامات کرنے کی ہدایت دی اور رات کے وقت نگرانی اور مسلسل معائنوں پر زور دیا۔
انہوں نے واضح کیا کہ بغیر قانونی اجازت کے کسی بھی کان کنی یا ہاٹ مکس پلانٹ کو چلانے کی اجازت نہیں دی جائے گی اور انتظامیہ کے ہر سطح پر جوابدہی کو لازمی قرار دیا۔ اجلاس میں افسران کو ہدایت دی گئی کہ کان کنی کی سرگرمیوں کے بارے میں تازہ اور جامع ڈیٹا فراہم کریں اور فیلڈ کی سطح پر نگرانی کو بہتر بنانے کے لیے پولیس کے ساتھ مسلسل رابطہ برقرار رکھیں۔
نائب وزیر اعلی نے کہا کہ مضبوط ڈیٹا مینجمنٹ نہ صرف بے ضابطگیوں کو بے نقاب کرے گی بلکہ معدنی وسائل کی مجموعی حکمرانی کو بھی مستحکم کرے گی۔ سریندر چودھری نے غیر قانونی کان کنی میں استعمال ہونے والی مشینری اور گاڑیوں کو فوری ضبط کرنے کا حکم دیا اور خلاف ورزی کرنے والوں پر بھاری جرمانے عائد کرنے کی ضرورت پر زور دیا۔ انہوں نے کہا کہ یہ اقدامات غیر قانونی سرگرمیوں کے خلاف مؤثر روک تھام کے طور پر کام کریں گے۔
نائب وزیر اعلی نے غیر قانونی کان کنی کے ماحولیاتی اثرات پر تشویش کا اظہار کرتے ہوئے پانی کے ذخائر میں آلودگی اور ماحولیاتی نقصان کے مسئلے کو حل کرنے کے لیے مربوط کوششوں کی اپیل کی۔ انہوں نے کہا کہ یہ اقدامات وسائل کے پائیدار انتظام کے لیے حکومت کے وسیع تر عزم سے ہم آہنگ ہیں۔ جموں و کشمیر مائننگ ویب پورٹل پر فیلڈ ڈیٹا اور ریکارڈز کے درمیان بار بار پائی جانے والی تضاد پر بات کرتے ہوئے سریندر چودھری نے افسران کو اس مسئلے کو فوری طور پر حل کرنے کی ہدایت دی اور معدنی وسائل کی حکمرانی میں شفافیت اور جوابدہی کی اہمیت کو اجاگر کیا۔اجلاس میں ڈائریکٹر جیولوجی اینڈ مائننگ پونیت شرما، تمام ضلعی مائننگ افسران اور دیگر متعلقہ حکام نے شرکت کی۔
ہندوستھان سماچار
---------------
ہندوستان سماچار / محمد اصغر
