نئی دہلی، 22 مارچ (ہ س)۔ وقف ایکٹ کی بعض دفعات کی آئینی حیثیت کو چیلنج کرنے والی ایک عرضی پر دہلی ہائی کورٹ میں سماعت کے دوران مرکزی حکومت نے کہا کہ وقف ایکٹ کی دفعات کو چیلنج کرنے والی ملک کے مختلف ہائی کورٹس میں کل 120 عرضیاں زیر التوا ہیں۔ ٹرانسفر کی درخواست بھی سپریم کورٹ میں زیر التوا ہے۔ چیف جسٹس ستیش چندر شرما کی سربراہی والی بنچ نے آٹھ ہفتوں کے بعد اس معاملے کی مزید سماعت کے لیے مقرر کیا ہے۔

سماعت کے دوران ہائی کورٹ نے دونوں فریقین کے دلائل سننے کے بعد کہا کہ مرکزی حکومت کو چاہئے کہ تمام مقدمات کو سپریم کورٹ میں منتقل کرنے کے لئے اقدامات کرے۔ 12 مئی 2022 کو عدالت نے مرکز کو نوٹس جاری کیا تھا۔ وقف ایکٹ سے متعلق ایک عرضی دیویندر ناتھ ترپاٹھی نے دائر کی ہے۔ عرضی میں وقف ایکٹ کی دفعہ 4,5,6,7,8,9,14 اور 16(A) کو چیلنج کیا گیا ہے۔ درخواست میں ان سیکشنز کو غیر قانونی قرار دینے کی استدعا کی گئی ہے۔ اس سے پہلے ایک اور عرضی بی جے پی لیڈر اور ایڈوکیٹ اشونی اپادھیائے نے دائر کی ہے۔ ہائی کورٹ اپادھیائے کی عرضی پر پہلے ہی نوٹس دے چکی ہے۔ اپادھیائے کی عرضی میں کہا گیا ہے کہ وقف بورڈ کے پاس ٹرسٹ، مٹھ، اکھاڑہ اور سوسائٹیوں سے زیادہ بلاتعطل اختیارات ہیں، جو اسے ایک خاص درجہ دیتے ہیں۔ درخواست میں مطالبہ کیا گیا ہے کہ تمام ٹرسٹ، خیراتی اداروں، مذہبی اداروں کے لیے یکساں قانون بنایا جائے۔ عرضی میں وقف ایکٹ کی دفعہ 4، 5، 6، 7، 8 اور 9 کو من مانی اور غیر قانونی قرار دیا گیا ہے۔ درخواست میں کہا گیا ہے کہ وقف ایکٹ کی یہ دفعات آئین کے آرٹیکل 14 اور 15 کی خلاف ورزی کرتی ہیں۔

عرضی میں کہا گیا ہے کہ وقف املاک کے انتظام کی آڑ میں وقف ایکٹ بنایا گیا ہے، لیکن وقف ایکٹ کے تحت ہندو، بدھ، جین، سکھ، بہائی یا عیسائی عقائد کے لیے کوئی قانون نہیں ہے۔ یہ ملک کی یکجہتی، سالمیت اور سیکولرازم کے خلاف ہے۔ آئین میں بھی وقف کا ذکر نہیں ہے۔ قابل ذکر ہے کہ سپریم کورٹ نے 13 اپریل کو اشونی اپادھیائے کی اسی طرح کی ایک عرضی کو خارج کر دیا ہے۔

ہندوستھان سماچار