نیویارک، 23 ستمبر (ہ س)۔ ایران کے صدر مسعود پزشکیان منگل (مقامی وقت) کو اقوام متحدہ کی جنرل اسمبلی (یو این جی اے) کے 81ویں اجلاس میں شرکت کے لیے نیویارک پہنچ گئے۔ وہ جنگ کے معاملے پر ایران کا موقف پیش کریں گے اور کشیدگی کم کرنے کے لیے سفارتی حل کی کوشش کریں گے۔ اس سے قبل امریکی صدر ڈونالڈ ٹرمپ خبردار کر چکے ہیں کہ اگر معاہدہ نہیں ہوا تو وہ اسلامی جمہوریہ کو ختم کر دیں گے۔

ارنا اور الجزیرہ کی رپورٹ کے مطابق، پزشکیان بدھ کی صبح جنرل اسمبلی کے اجلاس سے خطاب کریں گے۔ امید ہے کہ وہ اس دوران تنازعہ، مبینہ جرائم اور بین الاقوامی اداروں پر ایران کے عدم اعتماد جیسے مسائل پر تہران کا موقف پیش کریں گے۔ نیویارک روانہ ہونے سے قبل پزشکیان نے کہا، ”ہم بین الاقوامی پلیٹ فارموں پر ایران کا موقف مضبوطی سے پیش کریں گے۔ اقوام متحدہ میں ہم جن مسائل کو اٹھائیں گے، ان میں ایرانی عوام کی ابتر حالت، ہوئے جرائم اور پیدا ہوئے عدم اعتماد کو اجاگر کرنا شامل ہے۔ ہم کئی بار مذاکرات کی میز پر بیٹھے اور معاہدوں پر دستخط کیے، لیکن بدقسمتی سے پوری دنیا نے دیکھا کہ وعدے کیسے پورے نہیں کیے گئے اور معاہدوں کو پیروں تلے روند دیا گیا۔“

پزشکیان کی آمد ٹرمپ کے اقوام متحدہ کی جنرل اسمبلی سے خطاب کے فوراً بعد ہوئی، جس میں انہوں نے ایران کے ساتھ معاہدہ کرنے یا اسلامی جمہوریہ کے خلاف فوجی کارروائی کرنے کے درمیان ایک متبادل پیش کیا۔ ٹرمپ نے خبردار کیا کہ اگر تنازعہ ختم کرنے کے لیے کوئی معاہدہ نہیں ہوا تو وہ اسلامی جمہوریہ کو ختم کر سکتے ہیں۔ انہوں نے کہا کہ انہیں ایک بڑا فیصلہ کرنا ہے۔

ٹرمپ نے کہا کہ ایران انتظار کر رہا ہے کہ امریکی وسط مدتی انتخابات میں ان کی کارکردگی کیسی رہتی ہے۔ انہوں نے کہا کہ انتخابات کا تہران کے تئیں ان کے رویے پر کوئی اثر نہیں پڑے گا۔ انہوں نے کہا، ”ایران کے معاملے میں میں انتخابات کو بالکل بھی اہمیت نہیں دیتا اور نہ ہی دوں گا۔ یہ میرے ذہن میں بھی نہیں آتا۔ میرے لیے صرف ایک بات اہمیت رکھتی ہے کہ ایران کے پاس کبھی بھی جوہری ہتھیار نہیں ہوں گے۔“

رپورٹ کے مطابق، جب ٹرمپ نے تہران کے خلاف امریکی فوجی کارروائیوں کے بارے میں بات شروع کی تو ایرانی وفد کے ارکان اجلاس سے واک آوٹ کر گئے۔ ارنا کے مطابق، روانگی سے قبل پزشکیان کو پہلے نائب صدر محمد رضا عارف، سپریم لیڈر کے دفتر میں بین الاقوامی امور کے نائب حجةالاسلام والمسلمین محسن قمی اور ایرانی کابینہ کے ارکان نے باضابطہ طور پر رخصت کیا۔

نیویارک میں قیام کے دوران پزشکیان وہاں موجود سربراہان مملکت کے ساتھ دو طرفہ ملاقاتیں کریں گے۔ اس کے علاوہ امریکہ میں مقیم تعلیم یافتہ ایرانیوں، امریکی ممتاز شخصیات اور تھنک ٹینکس کے ساتھ الگ الگ بات چیت بھی کریں گے۔ پزشکیان کا خطاب ایسے وقت میں ہوگا جب اقوام متحدہ میں واشنگٹن اور تہران کے موقف میں زبردست اختلاف ہے۔

ہندوستھان سماچار

ہندوستان سماچار / محمد شہزاد