جموں, 02 ستمبر (ہ س): کرشن جنم اشٹمی کے موقع پر 3 ستمبر کو جموں شہر اور مضافاتی علاقوں میں چار شوبھا یاترائیں نکالی جائیں گی۔ شوبھا یاتراؤں کے پیش نظر ٹریفک پولیس نے خصوصی ٹریفک ایڈوائزری جاری کرتے ہوئے مختلف سڑکوں پر ٹریفک ڈائیورژن اور عارضی پابندیوں کا اعلان کیا ہے۔پہلی شوبھا یاترا دوپہر 3 بجے گیتا بھون، پریڈ گراؤنڈ سے شروع ہوگی اور شالامار، اندرا چوک، ہری مارکیٹ، رگھوناتھ جی مندر، ریزیڈنسی روڈ، شہیدی چوک، راجندر بازار، کنک منڈی، سٹی چوک، جین بازار، چوک چبوترا، پکا ڈنگہ، موتی بازار اور راج تلک روڈ سے ہوتی ہوئی واپس گیتا بھون اور شری رگھوناتھ جی مندر پہنچے گی۔

یاترا کے دوران اندرا چوک-ہری مارکیٹ کراسنگ، ڈینس گیٹ، ڈی سی دفتر اور پریڈ کراسنگ سمیت مختلف مقامات سے ٹریفک کو متبادل راستوں کی جانب موڑا جائے گا۔ کنک منڈی سے سٹی چوک جانے والی گاڑیوں کو شہیدی چوک سے ڈی سی دفتر کی جانب ڈائیورٹ کیا جائے گا۔دوسری شوبھا یاترا شام 4 بجے شکتی نگر میں واقع گرو گورکھ ناتھ گدی سے شروع ہوگی اور مختلف مقامات سے ہوتی ہوئی شکتی نگر کے مرکزی بازار پہنچے گی۔ اس دوران گڈھا موڑ، شکتی نگر اور ٹوپ پلی کے قریب ٹریفک کو متبادل راستوں پر منتقل کیا جائے گا۔

تیسری شوبھا یاترا شام 5 بجے نیو پلاٹ مندر سے شروع ہوکر ٹالی موڑ، وکاس نگر، سرواں اور سرواں شیو مندر سے ہوتی ہوئی نیو پلاٹ کے شری رادھا کرشن مندر پہنچے گی۔ امب پھلا، نیو پلاٹ اور ٹالی موڑ کے علاقوں میں بھی ٹریفک ڈائیورژن نافذ رہے گا۔

اسی طرح چوتھی شوبھا یاترا دوپہر 3 بجے نگروٹہ کے رام مندر ٹول پوسٹ سے شروع ہوکر مین بازار نگروٹہ سے ہوتی ہوئی کنڈولی مندر تک جائے گی۔ اس دوران زمینی صورتحال کے مطابق ضروری ٹریفک پابندیاں اور ڈائیورژن نافذ کیے جائیں گے۔

ٹریفک پولیس نے شہریوں سے اپیل کی ہے کہ شوبھا یاتراؤں کے مقررہ راستوں پر غیر ضروری سفر سے گریز کریں، متبادل راستے اختیار کریں اور ٹریفک اہلکاروں کے ساتھ تعاون کریں۔

ہندوستھان سماچار

---------------

ہندوستان سماچار / محمد اصغر