نئی دہلی، 19 ستمبر (ہ س)۔ ترقی پذیر ممالک کے لیے تحقیق و اطلاعاتی نظام (آر آئی ایس) کے بین الاقوامی سیمینار میں بھارت اور نیپال کے تعلقات کو کنیکٹیویٹی، اقتصادی تعاون اور مشترکہ ترقی کے نئے مرحلے میں لے جانے پر زور دیا گیا۔ اس موقع پر نیپال کے وزیر خزانہ ڈاکٹر سوارنِم واگلے نے کہا کہ دونوں ممالک کے پاس اپنے تاریخی اور گہرے تعلقات کی مضبوط بنیاد پر زیادہ پُرامن اور بلند حوصلہ شراکت داری قائم کرنے کا موقع ہے۔

ترقی پذیر ممالک کے لیے تحقیق و اطلاعاتی نظام (آر آئی ایس) کی جانب سے ہفتے کو ’ابھرتے ہوئے عالمی نظام میں بھارت-نیپال تعلقات کی نئی تشکیل‘ کے موضوع پر منعقد سیمینار میں نیپال کے وزیر خزانہ ڈاکٹر سوارنِم واگلے، حکومتِ ہند کی وزارتِ خارجہ میں ایڈیشنل سیکریٹری (شمال) منو مہاور، دہلی اسکول آف اکنامکس کے ڈائریکٹر پروفیسر رام سنگھ، بھارت کے سابق خارجہ سکریٹری اور آر آئی ایس کے سابق چیئرمین شیام سرن، آر آئی ایس گورننگ بورڈ اور گورننگ کونسل کے رکن ڈاکٹر شیشادری چاری اور آر آئی ایس کے ڈائریکٹر جنرل پروفیسر سچن کمار شرما سمیت بڑی تعداد میں پالیسی ساز، سفارت کار، ماہرینِ اقتصادیات، ماہرینِ تعلیم اور اسٹریٹجک امور کے ماہرین موجود رہے۔ سیمینار میں بھارت-نیپال تعلقات کی مستقبل کی سمت، تجارت و سرمایہ کاری، کنیکٹیویٹی، توانائی تعاون، سیاحت، ڈیجیٹل اور مالیاتی رابطے، سرحد پار پیداواری نیٹ ورک اور مشترکہ ترقی کے مختلف پہلوؤں پر تفصیلی تبادلۂ خیال کیا گیا۔

پروگرام میں ڈاکٹر سوارنِم واگلے نے کہا کہ بھارت اور نیپال کے تعلقات صرف دو پڑوسی ممالک کے درمیان رشتے نہیں ہیں، بلکہ مشترکہ تاریخ، ثقافت، عوام کے درمیان گہرے روابط اور اقتصادی تعاون پر مبنی ہیں۔ دونوں ممالک کے پاس سرحد پار رابطے، توانائی کی تجارت، سرمایہ کاری اور علاقائی اقتصادی انضمام کو نئی بلندیوں تک لے جانے کا موقع ہے۔ اب وقت آ گیا ہے کہ روایتی تعاون سے آگے بڑھتے ہوئے ایسے نئے طریقۂ کار وضع کیے جائیں، جو دونوں ممالک کے شہریوں کی زندگی میں براہِ راست اقتصادی فوائد پہنچا سکیں اور علاقائی ترقی کا ماڈل پیش کر سکیں۔

منو مہاور نے کہا کہ گزشتہ چند برسوں میں بھارت اور نیپال نے بجلی کی تجارت، سڑک اور ریل رابطے، پٹرولیم پائپ لائن اور دیگر بنیادی ڈھانچے کے منصوبوں میں نمایاں پیش رفت کی ہے۔ ان کامیابیوں کو بنیاد بنا کر دونوں ممالک کو ان بڑے اور تبدیلی لانے والے اقدامات کو آگے بڑھانا چاہیے، جو اب تک مختلف وجوہات کی بنا پر عملی شکل اختیار نہیں کر سکے ہیں۔ اگر دونوں ممالک اپنی صلاحیتوں کے مطابق اہداف طے کریں تو دوطرفہ تعاون کا دائرہ موجودہ سطح سے کہیں زیادہ وسیع ہو سکتا ہے۔

پروفیسر رام سنگھ نے کہا کہ بھارت اور نیپال کے تعلقات کی سب سے بڑی طاقت ان کا تسلسل اور سماجی بنیاد ہے۔ دونوں ممالک کے شہریوں کے درمیان قربت، کھلی سرحد اور مشترکہ ثقافتی ورثہ دنیا میں ایک منفرد مثال پیش کرتے ہیں۔ اقتصادی ترقی اور خوشحالی کے لیے اس تعلق کو مزید ادارہ جاتی اور جدید بنانے کی ضرورت ہے، تاکہ نیپال کے ترقیاتی سفر میں مزید رفتار آ سکے۔

ڈاکٹر شیشادری چاری نے کہا کہ بھارت اور نیپال کو ان شعبوں کی نشاندہی کرنی چاہیے جہاں تعاون کے ٹھوس اور عملی نتائج جلد سامنے آ سکتے ہیں۔ انہوں نے کہا کہ عوام کے معیارِ زندگی میں بہتری، اقتصادی مواقع میں توسیع اور علاقائی استحکام کے لیے دونوں ممالک کو مشترکہ وژن کے ساتھ آگے بڑھنا ہوگا۔

پروفیسر سچن کمار شرما نے کہا کہ تجارت، توانائی، تعلیم، صحت، ہنرمندی کی ترقی اور ترقیاتی شراکت داری کے شعبوں میں بھارت اور نیپال کے درمیان مضبوط تکمیلات موجود ہیں۔ دونوں ممالک کے تعلقات قربت کے مرحلے سے آگے بڑھ چکے ہیں اور اب انہیں مشترکہ خوشحالی کی سمت میں آگے بڑھنا چاہیے۔ اس کے لیے باہمی رکاوٹوں کو کم کرنے، رابطوں میں اضافہ کرنے اور اقتصادی مواقع کو وسعت دینے کی ضرورت ہے۔

سیمینار میں شریک ماہرین نے بدلتے ہوئے عالمی اقتصادی اور اسٹریٹجک حالات پر بھی تبادلۂ خیال کیا۔ بحث میں جغرافیائی اقتصادی تقسیم، بدلتی ہوئی تجارتی اور صنعتی پالیسیاں، تکنیکی تبدیلی، موسمیاتی تبدیلی، توانائی و غذائی تحفظ اور ترقی پذیر ممالک کے سامنے ابھرتے ہوئے چیلنجز اہم موضوعات شامل رہے۔

ہندوستھان سماچار

---------------

ہندوستان سماچار / عبدالواحد