عمر عبداللہ نے امرتسر پنجاب میں تزئین و آرائش کے بعد جموں و کشمیر ہاؤس کا افتتاح کیا

جموں، 18 ستمبر (ہ س)۔ جموں و کشمیر کے وزیر اعلیٰ عمر عبداللہ نے امرتسر پنجاب میں تزئین و آرائش کے بعد جموں و کشمیر ہاؤس کا افتتاح کیا۔ دو-کورٹ روڈ پر واقع تاریخی عمارت کو جدید سہولیات سے آراستہ کیا گیا ہے، جس کا مقصد امرتسر آنے والے جموں و کشمیر کے باشندوں، خصوصاً علاج کے لیے آنے والے مریضوں اور ان کے تیمارداروں کو کم خرچ اور آرام دہ رہائش فراہم کرنا ہے۔

حکام کے مطابق عمارت کی تزئین و آرائش کا کام اکتوبر 2025 میں شروع ہوا تھا اور تقریباً 2.30 کروڑ روپے کی لاگت سے مکمل کیا گیا۔ منصوبے کے تحت سول و برقی کام، اندرونی تزئین، مہمانوں کی سہولیات اور بیرونی بنیادی ڈھانچے کو بہتر بنایا گیا ہے۔ جموں و کشمیر ہاؤس میں چار مہمان کمرے، منسلک ڈریسنگ ایریا اور غسل خانے کے علاوہ مشترکہ بیٹھک، کھانے کا کمرہ اور باورچی خانہ بھی موجود ہے۔ اہم اسپتالوں کے قریب واقع ہونے کے باعث یہ سہولت علاج کے لیے امرتسر آنے والے مریضوں اور ان کے تیمارداروں کے لیے مفید ثابت ہوگی۔

وزیراعلیٰ عمر عبداللہ نے سہولیات کا معائنہ کرتے ہوئے متعلقہ افسران کو صفائی، مہمان نوازی اور عمارت کی مناسب دیکھ بھال کے اعلیٰ معیار کو برقرار رکھنے کی ہدایت دی۔

اس موقع پر عمر عبداللہ نے کہا کہ یہ سہولت جموں و کشمیر سے علاج کے لیے باہر جانے والے مریضوں اور ان کے اہل خانہ کو درپیش مشکلات کم کرنے میں مدد دے گی۔ انہوں نے کہا کہ طلبہ، یاتری اور دیگر افراد بھی اس رہائشی سہولت سے استفادہ کر سکیں گے۔

وزیراعلیٰ کے مشیر ناصر اسلم وانی، ایڈیشنل چیف سکریٹری دھیرج گپتا، ریزیڈنٹ کمشنر جموں و کشمیر رمیش کمار، سکریٹری ہاسپیٹیلٹی اینڈ پروٹوکول اونی لاوسا، ایڈیشنل ریزیڈنٹ کمشنر انل شرما سمیت جموں و کشمیر اور پنجاب حکومت کے دیگر اعلیٰ افسران بھی اس موقع پر موجود تھے۔

ہندوستھان سماچار

---------------

ہندوستان سماچار / محمد اصغر