میلان، 15 ستمبر (ہ س)۔ دفاعی چیمپئن انٹر میلان نے دو گول سے پیچھے ہونے کے بعد شاندار واپسی کرتے ہوئے پیر کو اڈینیزے کو 3-5 سے شکست دے کر سیری اے میں اپنا سو فیصد ریکارڈ برقرار رکھا۔ اس جیت کے ساتھ انٹر چار میچوں میں 12 پوائنٹس کے ساتھ روما کے ہمراہ مشترکہ طور پر پہلے نمبر پر برقرار ہیں۔

انٹر میلان کی شروعات انتہائی خراب رہی۔ جیمز ابانکواہ اور یورگن ایکیلن کیمپ نے ابتدائی 16 منٹ میں گول کرکے اڈینیزے کو 0-2 کی برتری دلا دی اور انٹر کو بڑا جھٹکا دیا۔

اس کے بعد کارلوس آگستو نے دور سے شاندار گول کرکے انٹر کی واپسی کی بنیاد رکھی۔ نکولو باریلا نے ہاف ٹائم سے 10 منٹ قبل گول کرکے اسکور 2-2 سے برابر کر دیا۔

دوسرے ہاف میں انٹر نے مکمل طور پر میچ پر کنٹرول حاصل کر لیا۔ مارکس تھورام نے 59ویں منٹ میں گول کرکے ٹیم کو پہلی بار برتری دلائی۔ اس کے بعد فرانسسکو ایسپوسیتو اور آنگے یوان بونی نے گول کرکے انٹر کی برتری 5-2 کر دی۔ انجری ٹائم میں ادریسا گوئے نے اڈینیزے کے لیے ایک گول کیا، لیکن یہ شکست ٹالنے کے لیے کافی نہیں تھا۔

روما نے بھی ٹورینو کو 0-2 سے شکست دے کر مسلسل چوتھی فتح حاصل کی۔ ڈونیل مالین اور نکولو پیسیلی نے روما کے لیے گول کیے۔ مالین نے گول کیپر لوکاس پیری کی دفاعی غلطی کا فائدہ اٹھاتے ہوئے ٹیم کو برتری دلائی۔

پیسیلی نے میچ کے آخری مرحلے میں جیانلوکا مانچینی کے پاس کو گول میں تبدیل کرکے روما کی فتح یقینی بنا دی۔ روما کے بھی چار میچوں میں 12 پوائنٹس ہیں۔ انٹر اور روما کی اگلی ٹکراؤ اسٹیڈیو اولمپیکو میں ہوگی۔

ایک اور مقابلے میں کومو نے پارما کو 1-2 سے شکست دے کر پوائنٹس ٹیبل میں تیسری پوزیشن حاصل کر لی۔ جیکوبو رامون اور کائیکی برونو نے کومو کے لیے گول کیے۔ یہ فتح کومو کی ہفتے کے وسط میں یوئیفا چیمپئنز لیگ میں کامیابی کے بعد حاصل ہوئی ہے۔

ہندوستھان سماچار

---------------

ہندوستان سماچار / عبدالواحد