گوہاٹی، 9 اگست (ہ س)۔ آسام کے وزیر اعلیٰ ڈاکٹر ہیمنت بسوا سرما نے آئل انڈیا لمیٹڈ (او آئی ایل) اور نومالی گڑھ ریفائنری لمیٹڈ (این آر ایل) کی جانب سے حاصل کی گئی ریکارڈ مالی اور آپریشنل کارکردگی پر خوشی کا اظہار کیا ہے۔ انہوں نے اس کامیابی کو آسام کے لیے باعثِ فخر قرار دیتے ہوئے کہا کہ یہ ملک کی توانائی سلامتی میں ریاست کے اہم کردار کو مزید مضبوط کرتی ہے۔

وزیر اعلیٰ نے اتوار کو سوشل میڈیا پلیٹ فارم ’ایکس‘ پر ایک پوسٹ میں کہا کہ او آئی ایل نے 2,870 کروڑ روپے کا اب تک کا سب سے زیادہ سہ ماہی اسٹینڈ الون ٹیکس کے بعد منافع(پی اے ٹی) درج کیا ہے، جو گزشتہ سال کی اسی مدت کے مقابلے میں تقریباً ڈھائی گنا زیادہ ہے۔ انہوں نے بتایا کہ اس اضافے کی اہم وجہ خام تیل کی پیداوار میں 11 فیصد اضافہ اور قیمتوں سے حاصل ہونے والی بہتر آمدنی ہے۔

او آئی ایل کا مجموعی پی اے ٹی 4,027 کروڑ روپے رہا، جو گزشتہ سال کے مقابلے میں 97 فیصد زیادہ ہے۔ اس دوران کمپنی کی خام تیل کی پیداوار 0.950 ملین میٹرک ٹن تک پہنچ گئی۔کمپنی نے ایک دن میں خام تیل کی اب تک کی سب سے زیادہ پیداوار کا بھی نیا ریکارڈ قائم کیا۔ روزانہ پیداوار 10,921 ٹن، یعنی تقریباً 84,109 بیرل تک پہنچ گئی۔وزیر اعلیٰ نے انڈمان بیسن میں او آئی ایل کی جاری تلاش کی سرگرمیوں کا بھی ذکر کیا۔ اس کے علاوہ آسام میں ایک آن شور کنویں میں 3,116 میٹر کے سب سے زیادہ افقی ڈسپلیسمنٹ حاصل کرنے کی کمپنی کی کامیابی کو بھی اہم قرار دیا۔

دوسری جانب نومالی گڑھ ریفائنری لمیٹڈ (این آر ایل) نے بھی مالی کارکردگی کے معاملے میں نمایاں کامیابی حاصل کی ہے۔ کمپنی کے ٹیکس کے بعد منافع میں گزشتہ سال کے مقابلے میں 167 فیصد اضافہ ہوا اور یہ بڑھ کر 1,305 کروڑ روپے تک پہنچ گیا۔

این آر ایل نے 35.95 ڈالر فی بیرل کا مجموعی ریفائننگ مارجن اور 87.58 فیصد ڈسٹیلیٹ ییلڈ بھی حاصل کیا۔وزیر اعلیٰ ڈاکٹر ہیمنت بسوا سرما نے او آئی ایل اور این آر ایل کی ٹیموں کو ان کامیابیوں پر مبارکباد دیتے ہوئے کہا کہ یہ نتائج آسام کے توانائی کے شعبے میں بڑھتے ہوئے کردار کی عکاسی کرتے ہیں۔ انہوں نے کہا کہ دونوں کمپنیوں کی بہتر کارکردگی نہ صرف ریاست کے لیے باعثِ فخر ہے بلکہ ملک کی توانائی سلامتی کو مضبوط بنانے میں بھی اہم کردار ادا کرتی ہے۔

ہندوستھان سماچار

ہندوستان سماچار / Mohammad Khan