جموں،07 اگست (ہ س)۔

سالانہ امرناتھ یاترا جمعہ کو بھی سخت سیکورٹی انتظامات کے درمیان پرامن طور پر جاری رہی۔ بھگوتی نگر یاتری نیواس جموں سے 926 یاتریوں پر مشتمل تازہ جتھہ بالتل بیس کیمپ کے لیے روانہ ہوا، جبکہ بالتل سے 133 یاتریوں کا ایک جتھہ جموں کے لیے واپس روانہ کیا گیا۔زونل پولیس کنٹرول روم جموں کے مطابق یاترا کے 29ویں جتھے میں 693 مرد، 178 خواتین، 34 سادھو اور 21 سادھویاں شامل تھیں۔ یہ جتھہ صبح 2 بج کر 59 منٹ پر 42 گاڑیوں میں بھگوتی نگر یاتری نواس سے روانہ ہوا۔ جتھے میں 21 بسیں، تین میڈیم موٹر وہیکلز (ایم ایم ویز)، 17 لائٹ موٹر وہیکلز (ایل ایم ویز) اور ایک دو پہیہ گاڑی شامل تھی۔

یاتریوں کا جتھہ جموں-سری نگر قومی شاہراہ پر واقع رامبن ضلع سے کثیر سطحی سیکورٹی حصار میں گزرا اور بعد ازاں گاندربل ضلع کے بالتل بیس کیمپ کی جانب روانہ ہوگیا۔ یاترا کے دوران شاہراہ پر ٹریفک اور سیکورٹی اہلکار تعینات رہے تاکہ یاتریوں کی محفوظ اور بلا رکاوٹ آمدورفت کو یقینی بنایا جا سکے۔

ادھر جوائنٹ پولیس کنٹرول روم بالتل کے مطابق 27واں واپسی قافلہ 133 یاتریوں کو لے کر جموں کے لیے روانہ ہوا۔ اس قافلے میں 110 مرد، 21 خواتین اور دو بچے شامل تھے، جو سات گاڑیوں کے ذریعے جموں کی جانب روانہ ہوئے۔ ان گاڑیوں میں تین ہیوی موٹر وہیکلز، ایک لائٹ موٹر وہیکل اور تین ٹرک شامل تھے۔

ہندوستھان سماچار

ہندوستان سماچار / محمد اصغر