ممبئی ، 30 اگست (ہ س)۔ ممبئی پولیس نے 1 ستمبر کو آزاد میدان میں او بی سی طبقے کی جانب سے منعقد کیے جانے والے احتجاجی مظاہرے کی اجازت دینے سے انکار کر دیا ہے۔ پولیس نے واضح کیا ہے کہ اس احتجاج کے باعث شہر میں ٹریفک جام کی صورتحال پیدا ہو سکتی ہے، جبکہ قانون و نظم اور صحت خدمات بھی متاثر ہونے کا امکان ہے۔ ان وجوہات کی بنیاد پر پولیس نے احتجاج کی اجازت نہیں دی۔ او بی سی لیڈر لکشمن ہاکے نے یکم ستمبر کو چلو ممبئی تحریک کا اعلان کیا ہے۔ ان کا کہنا ہے کہ یہ تحریک او بی سی ریزرویشن کے حقوق کے تحفظ کے لیے شروع کی جا رہی ہے۔لکشمن ہاکے کا الزام ہے کہ او بی سی طبقے کے لیے مقرر ریزرویشن کے حق میں مراٹھا کنبی سرٹیفکیٹ جاری کیے جا رہے ہیں، جس کی وہ مخالفت کر رہے ہیں۔ ان کا مطالبہ ہے کہ مراٹھا طبقے کو ای ڈبلیو ایس یا ایس ای بی سی کوٹے کے تحت ریزرویشن دیا جائے، لیکن انہیں او بی سی کوٹے میں شامل نہ کیا جائے۔ اس تحریک کے لیے ریاست بھر سے او بی سی طبقے کے لوگوں نے یکم ستمبر کو ممبئی کے آزاد میدان میں جمع ہونے کی تیاری کی تھی۔ احتجاج کے انعقاد کے لیے ملیکارجن پجاری کے نام سے آزاد میدان پولیس اسٹیشن میں اجازت کے لیے درخواست بھی دی گئی تھی۔تاہم آزاد میدان پولیس نے مختلف وجوہات کا حوالہ دیتے ہوئے اس تحریک کی اجازت دینے سے انکار کر دیا۔ پولیس کے مطابق، اگر بڑی تعداد میں مظاہرین آزاد میدان اور اس کے اطراف میں جمع ہوتے ہیں تو علاقے میں موجود اسپتالوں اور ان کی خدمات پر اثر پڑ سکتا ہے۔ پولیس کا یہ بھی کہنا ہے کہ ریاست کے مختلف علاقوں سے بڑی تعداد میں لوگوں کے ممبئی آنے کی صورت میں شہر کا ٹریفک نظام متاثر ہو سکتا ہے اور اہم سڑکوں پر شدید ٹریفک جام پیدا ہونے کا خدشہ ہے۔اس کے علاوہ پولیس نے یہ خدشہ بھی ظاہر کیا ہے کہ بڑی بھیڑ کی وجہ سے قانون و نظم کا مسئلہ پیدا ہو سکتا ہے، جس سے مقامی شہریوں کو مختلف مشکلات کا سامنا کرنا پڑ سکتا ہے۔ او بی سی طبقے کے بڑی تعداد میں افراد 1 ستمبر کو آزاد میدان پہنچنے کی تیاری کر رہے ہیں، تاہم پولیس کی جانب سے احتجاج کی اجازت دینے سے انکار کے بعد اب یہ دیکھنا ہوگا کہ او بی سی قیادت اس معاملے میں آگے کیا فیصلہ کرتی ہے۔ ہندوستھان سماچار
--------------------
ہندوستان سماچار / جاوید این اے
