دہرادون، 29 اگست (ہ س)۔ اتراکھنڈ کے دہرادون ضلع کے چکرّاتا علاقے میں ہفتہ کی صبح ایک کار سڑک سے تقریباً 35 میٹر نیچے گہری کھائی میں جا گری۔ حادثے میں کار سوار دو افراد شدید زخمی ہوگئے، جبکہ تین کو معمولی چوٹیں آئی ہیں۔ ایس ڈی آر ایف اور مقامی پولیس کی مشترکہ ٹیم نے سخت محنت کے بعد تمام پانچ زخمیوں کو بحفاظت کھائی سے باہر نکال کر اسپتال پہنچایا۔

ایس ڈی آر ایف کے مطابق، ڈائل-112 کے ذریعے اطلاع ملی کہ ساہیا سے پہلے لال پل کے قریب ایک گاڑی سڑک سے نیچے کھائی میں گر گئی ہے اور اس میں کچھ لوگ پھنسے ہوئے ہیں۔ اطلاع ملتے ہی ایس ڈی آر ایف چکرّاتا سے سب انسپکٹر جسپال سنگھ کی قیادت میں ٹیم جائے حادثہ کے لیے روانہ ہوئی۔

موقع پر پہنچنے پر ٹیم نے دیکھا کہ کار سڑک سے تقریباً 35 میٹر نیچے کھائی میں گری ہوئی ہے۔ کار میں کل پانچ افراد سوار تھے، جن میں تین مرد اور دو خواتین شامل تھیں۔

ایس ڈی آر ایف کی ٹیم نے مقامی پولیس کے ساتھ تال میل کرکے ریسکیو آپریشن شروع کیا۔ جوانوں نے کھائی میں اتر کر زخمیوں تک رسائی حاصل کی اور پانچوں افراد کو بحفاظت باہر نکال لیا۔ اس کے بعد زخمیوں کو ایمبولینس کے ذریعے علاج کے لیے اسپتال بھیج دیا گیا۔

زخمیوں میں روہن کمار (23) ساکن نئی دہلی، ابھیشیک دوبے (26) ساکن روہنی، دہلی، ابھیشیک (26) ساکن نوئیڈا، اتر پردیش، شوانی سنگھ (22) اور پرنس راج (22)، دونوں وارانسی، اتر پردیش کے ہیں۔ پولیس حادثے کی وجوہات کی جانچ کر رہی ہے۔

ہندوستھان سماچار

---------------

ہندوستان سماچار / عبدالواحد