تمل ناڈو کے وزیراعلیٰ وجے میتور ڈیم سے پانی چھوڑیں گے، ڈیلٹا علاقے کے کسانوں کو بڑی راحت ملنے کی امیدسیلم، 28 اگست (ہ س)۔ ڈیلٹا علاقے میں آبپاشی کے لیے آئندہ یکم ستمبر کو میتور ڈیم سے پانی چھوڑنے کے مجوزہ پروگرام کے پیش نظر تیاریاں تیز کردی گئی ہیں۔ تمل ناڈو حکومت کے مطابق وزیراعلیٰ وجے میتور ڈیم سے ڈیلٹا علاقے کی آبپاشی کے لیے پانی چھوڑیں گے۔ پروگرام کو دیکھتے ہوئے محکمہ آبی وسائل، پولیس اور دیگر متعلقہ محکموں نے تیاریاں شروع کردی ہیں۔عام طور پر ہر سال میتور ڈیم سے ڈیلٹا علاقے کی آبپاشی کے لیے 12 جون کو پانی چھوڑا جاتا ہے، لیکن اس سال ڈیم میں پانی کا وافر ذخیرہ نہ ہونے کے باعث مقررہ تاریخ پر پانی نہیں چھوڑا جاسکا۔ اسی طرح یکم اگست کو مشرقی اور مغربی نہروں کی آبپاشی کے لیے بھی پانی چھوڑنے کا عمل شروع نہیں ہوسکا۔وقت پر آبپاشی کا پانی نہ ملنے کی وجہ سے ڈیلٹا علاقے کے کسانوں کو مشکلات کا سامنا کرنا پڑا ہے۔ کئی علاقوں میں پانی کی قلت کے باعث فصلیں خشک ہونے کی صورتحال تک پہنچ گئیں۔ کسانوں کی مشکلات کو دیکھتے ہوئے دھان کی کاشت کو مدد فراہم کرنے کے مقصد سے وزیراعلیٰ وجے نے 134 کروڑ روپے کے کوروائی خصوصی پیکیج کا بھی اعلان کیا تھا۔دریں اثنا کرناٹک کے کابینی اور کے آر ایس ڈیموں سے چھوڑا گیا پانی اوکا نیککل کے راستے میٹور ڈیم کی جانب پہنچنے لگا ہے۔ اس کے باعث میٹور ڈیم میں پانی کی آمد میں بتدریج اضافہ ہورہا ہے۔ حکام کے مطابق ڈیم کی سطح جلد ہی 90 فٹ تک پہنچنے کا امکان ہے۔پانی کی دستیابی اور ممکنہ آمد کو دیکھتے ہوئے تمل ناڈو حکومت نے یکم ستمبر سے ڈیلٹا علاقے کی آبپاشی کے لیے پانی چھوڑنے کا فیصلہ کیا ہے۔حکومت کی جانب سے جاری پریس ریلیز میں کہا گیا ہے کہ یکم ستمبر سے 45 دن تک ڈیم میں موجود پانی کے ذخیرے اور پانی کی آمد کو مدنظر رکھتے ہوئے آبپاشی کے لیے پانی چھوڑا جائے گا۔پریس ریلیز کے مطابق 2026-27 کے آبپاشی سال کے آغاز میں میٹور ڈیم میں قابل استعمال پانی کا ذخیرہ صرف 41.223 ٹی ایم سی تھا۔ کرناٹک کے ڈیموں سے مناسب مقدار میں پانی نہ ملنے اور ڈیم میں کم از کم 10 ٹی ایم سی پانی کا ذخیرہ برقرار رکھنا ضروری ہونے کی وجہ سے ڈیلٹا علاقے کی آبپاشی کے لیے مسلسل پانی فراہم کرنا ممکن نہیں تھا۔وزیراعلیٰ کے مجوزہ پانی چھوڑنے کے پروگرام کے پیش نظر میتور ڈیم کے احاطے میں مختلف محکموں کے افسران نے معائنہ کیا۔ پولیس افسران، محکمہ آبی وسائل کے حکام اور وزیر ٹرانسپورٹ وجے تملن پارتیبن نے ڈیم کے علاقے کا جائزہ لیا۔فی الحال محکمہ آبی وسائل کی جانب سے پروگرام کے لیے اسٹیج تیار کیا جارہا ہے۔ ڈیم کے آس پاس اُگی جھاڑیوں کو صاف کیا جارہا ہے۔ اس کے علاوہ داخلی دروازے اور اطراف کی دیواروں پر رنگ و روغن کا کام بھی تیزی سے جاری ہے۔ڈیم کے احاطے میں بڑی تعداد میں بندروں کی موجودگی کے پیش نظر محکمہ جنگلات نے بھی کارروائی شروع کردی ہے۔ بندروں کو محفوظ طریقے سے پکڑنے کے لیے علاقے میں پنجرے لگانے کا عمل شروع کردیا گیا ہے۔حکام کے مطابق پانی چھوڑنے کے پروگرام کے دوران ڈیم کے اطراف انتظامات کو بہتر بنانے اور عوام و کسانوں کی سہولت کے لیے متعلقہ محکموں کے درمیان تال میل قائم رکھا جارہا ہے۔ہندوستھان سماچار

ہندوستان سماچار / Mohammad Khan