نیرج چوپڑا نے ڈائمنڈ لیگ فائنل کے لیے کوالیفائی کیا

نئی دہلی، 28 اگست (ہ س)۔

ہندوستان کے اسٹار جیولن تھرو (نیزہ بازی) کے کھلاڑی نیرج چوپڑا نے 2026 ڈائمنڈ لیگ کے فائنل میں جگہ بنا لی ہے۔ سیزن کا فائنل 4 اور 5 ستمبر کو برسلز میں منعقد ہوگا۔

دو بار کے اولمپک تمغہ جیتنے والے نیرج نے اس سیزن میں ڈائمنڈ لیگ کے دو مرحلوں میں حصہ لیا۔ انہوں نے 19 جون کو دوحہ مرحلے میں 85.69 میٹر کی کوشش کے ساتھ چوتھی پوزیشن حاصل کی تھی۔ اس کے بعد 21 اگست کو لوزان مرحلے میں 88.05 میٹر کی سیزن کی اپنی بہترین کارکردگی کا مظاہرہ کرتے ہوئے دوسری پوزیشن حاصل کی۔ نیرج 27 اگست کو زیورخ مرحلے میں نہیں اترے، جہاں مردوں کے جیولن تھرو کا مقابلہ بھی پروگرام میں شامل تھا۔ تاہم، لوزان میں ان کی کارکردگی نے فائنل میں جگہ پکی کرنے کے لیے کافی پوائنٹس دلائے۔

نیرج نے اس سیزن میں گلاسگو دولت مشترکہ کھیلوں میں بھی 85.83 میٹر کے تھرو کے ساتھ چاندی کا تمغہ جیتا تھا۔ برسلز میں ہونے والے فائنل سے قبل سری لنکا کے رومیش تھارنگا پاتھیرانا نیزہ بازی کی پوائنٹس ٹیبل میں سرفہرست ہیں۔ انہوں نے زیورخ مرحلے میں 92.07 میٹر کی شاندار کوشش کے ساتھ جیت درج کی۔ اینڈرسن پیٹرز، کیشورن والکوٹ اور کرٹس تھامپسن بھی خطاب کے اہم دعویداروں میں شامل ہیں۔ نیرج کی نگاہیں اپنے دوسرے ڈائمنڈ ٹرافی خطاب پر ہوں گی۔ انہوں نے 2022 میں ڈائمنڈ لیگ کا خطاب جیتا تھا اور اس کے بعد تین بار رنر اپ رہے ہیں۔

اس طرح ملتے ہیں ڈائمنڈ لیگ میں پوائنٹس

ڈائمنڈ لیگ میں مئی سے ستمبر تک 14 مرحلے ہوتے ہیں۔ ہر مقابلے میں سرفہرست آٹھ کھلاڑیوں کو بالترتیب 8، 7، 6، 5، 4، 3، 2 اور 1 پوائنٹ ملتا ہے۔

نیرج نے دوحہ میں چوتھی پوزیشن کے لیے سات اور لوزان میں دوسری پوزیشن کے لیے پانچ پوائنٹس حاصل کیے، جس سے ان کے کل 12 پوائنٹس ہو گئے۔

کینیا کے جولیس یگو زیورخ مرحلے سے پہلے نو پوائنٹس پر تھے۔ زیورخ میں 81.66 میٹر کی کوشش کے ساتھ پانچویں مقام پر رہنے کے بعد ان کے 13 پوائنٹس ہو گئے اور انہوں نے بھی فائنل کے لیے کوالیفائی کر لیا۔

ہندوستھان سماچار

ہندوستان سماچار / انظر حسن