گرمیت رام رحیم کو 21 دن کی فرلو ملی، 17ویں بار جیل سے باہر آیا

روہتک، 25 اگست (ہ س)۔ جنسی استحصال اور قتل کے معاملے میں سزا کاٹ رہا ڈیرہ سچا سودا کا سربراہ گرمیت رام رحیم ایک بار پھر سناریا جیل سے باہر آ گیا ہے۔ ابتدائی معلومات کے مطابق رام رحیم کو 21 دن کی فرلو منظور کی گئی ہے، جس کے بعد منگل کی صبح سخت سیکورٹی انتظامات کے تحت اسے جیل سے باہر لایا گیا اور وہ سرسا کے لیے روانہ ہو گیا۔ گُرمیت رام رحیم 17ویں بار روہتک کی سناریا جیل سے پیرول یا فرلو پر باہر آیا ہے۔

گُرمیت رام رحیم کو اگست 2017 میں سادھویوں کے جنسی استحصال کے معاملے میں مجرم قرار دیے جانے کے بعد سناریا جیل بھیجا گیا تھا۔ اس کے علاوہ صحافی رام چندر چھترپتی قتل کیس میں بھی اسے سزا سنائی جا چکی ہے۔ سال 2026 میں رام رحیم کو اس سے قبل دو بار جیل سے باہر آنے کا موقع ملا۔ جنوری کے مہینے میں اسے 40 دن کی پیرول، جبکہ مئی کے مہینے میں 30 دن کی پیرول ملی تھی۔ مئی میں ملنے والی 30 دن کی پیرول مکمل کرنے کے بعد گُرمیت رام رحیم 26 جون کو واپس سناریا جیل پہنچا تھا۔

اب ایک بار پھر 21 دن کی فرلو ملنے کے بعد رام رحیم جیل سے باہر آیا ہے۔ ضلع جیل سناریا نے رام رحیم کے لیے 21 دن کی فرلو منظور کی ہے۔ یہ پہلی بار نہیں ہے جب رام رحیم جیل سے باہر آیا ہے۔ اب تک وہ 16 بار جیل سے باہر آ چکا ہے۔ اب 17ویں بار وہ جیل سے باہر نکلا ہے۔ اس کے باہر آنے کے دوران سیکورٹی کے پختہ انتظامات رکھے گئے اور پولیس کی سخت نگرانی میں اسے سرسا کے لیے روانہ کیا گیا۔ رام رحیم کے 17ویں بار جیل سے باہر آنے کے بعد ایک بار پھر اس کی پیرول اور فرلو کو لے کر چہ مگوئیاں تیز ہو گئی ہیں۔

ہندوستھان سماچار

---------------

ہندوستان سماچار / انظر حسن