علی گڑھ، 25 اگست (ہ س)۔

انسٹی ٹیوٹ آف کمپنی سیکریٹریز آف انڈیا (آئی سی ایس آئی) کی جانب سے جاری سی ایس امتحان کے نتائج میں تالا نگری علی گڑھ کی بیٹی منیشا سنگھ نے شاندار کامیابی حاصل کرتے ہوئے ملک بھر میں 19ویں رینک (AIR-19) حاصل کی ہے۔ ان کی اس کامیابی سے نہ صرف ان کے اہل خانہ بلکہ پورے علی گڑھ کا نام روشن ہوا ہے۔ نتیجہ جاری ہوتے ہی ان کے گھر میں جشن کا ماحول بن گیا اور مبارکباد دینے والوں کا تانتا بندھ گیا۔

منیشا سنگھ نے اپنی کامیابی کا سہرا اپنے والدین کے مسلسل تعاون اور اساتذہ کی رہنمائی کو دیا۔ انہوں نے بتایا کہ اس مقام تک پہنچنے کے لیے انہوں نے نظم و ضبط کے ساتھ روزانہ 8 سے 10 گھنٹے باقاعدگی سے پڑھائی کی۔ امتحان کی تیاری کے دوران سوشل میڈیا سے دوری اختیار کی اور نظرثانی (ریویژن) اور ماک ٹیسٹ پر خصوصی توجہ دی۔

اپنی کامیابی پر خوشی کا اظہار کرتے ہوئے منیشا نے کہا کہ سی ایس کی تیاری میں تسلسل اور نظریاتی وضاحت سب سے زیادہ اہم ہے۔ انہوں نے نوجوان امیدواروں کو پیغام دیتے ہوئے کہا کہ مشکل حالات میں بھی اگر اپنے مقصد پر توجہ مرکوز رکھی جائے اور خود اعتمادی برقرار رکھی جائے تو کسی بھی بڑے امتحان میں کامیابی حاصل کی جاسکتی ہے۔

بیٹی کی اس شاندار کامیابی پر اہل خانہ خوشی سے نہال ہیں۔ علاقے کے معزز شہریوں، اساتذہ اور پڑوسیوں نے منیشا کے گھر پہنچ کر انہیں مٹھائی کھلا کر مبارکباد پیش کی اور ان کے روشن مستقبل کے لیے نیک خواہشات کا اظہار کیا۔

ہندوستان سماچار / سید کامران علی گڑھ