انٹیگریٹڈ ملٹی ماڈل لاجسٹک ہب کے نو تعمیر شدہ ریل یارڈ سے مال گاڑی روانہ

چنڈی گڑھ، 23 اگست (ہ س)۔

ہریانہ کے وزیر اعلیٰ نائب سنگھ سینی نے اتوار کو ضلع مہندر گڑھ کے نانگل چودھری علاقے میں واقع انٹیگریٹڈ ملٹی ماڈل لاجسٹک ہب (آئی ایم ایل ایچ) کے نو تعمیر شدہ ریل یارڈ سے پہلی مال گاڑی کو ہری جھنڈی دکھا کر روانہ کیا۔ تقریباً 280 کروڑ روپے کی لاگت سے تیار ہونے والی اس ریلوے کنیکٹیویٹی کے آغاز سے ہریانہ کے لاجسٹکس بنیادی ڈھانچے کو تقویت ملے گی۔

اس موقع پر وزیر اعلیٰ نے کہا کہ پہلے مرحلے میں تقریباً 408 ایکڑ رقبے پر تیار ہونے والا یہ منصوبہ مجموعی طور پر 1300 کروڑ روپے کی لاگت سے مکمل کیا جا رہا ہے۔ یہ ملک کے 50 بڑے بنیادی ڈھانچے کے منصوبوں میں شامل ہے۔ منصوبہ مکمل طور پر تیار ہونے کے بعد سالانہ تقریباً 20 لاکھ کنٹینرز کی ہینڈلنگ کی صلاحیت پیدا ہوگی، جس سے آٹوموبائل، مشینری، گارمنٹس اور زرعی مصنوعات جیسی اہم صنعتوں کو براہ راست فائدہ پہنچے گا۔

وزیر اعلیٰ نے کہا کہ نانگل چودھری کا یہ ہب ریل اور سڑک دونوں رابطوں کو آپس میں جوڑتا ہے، جس سے مغربی بندرگاہوں سے قومی دارالحکومت خطے (این سی آر) تک مال کی آمدورفت پہلے کے مقابلے میں زیادہ تیز، آسان اور کم خرچ ہوگی۔ انہوں نے کہا کہ اس ہب کے آپریشنل ہونے سے پورے علاقے میں روزگار اور کاروبار کے نئے مواقع پیدا ہوں گے۔ حکومت نے پورے علاقے میں بجلی، پانی اور سڑک جیسی بنیادی سہولتیں پہلے ہی مکمل کر دی ہیں۔

ہندوستھان سماچار

ہندوستان سماچار / عطاءاللہ