سری نگر، 23 اگست (ہ س)۔

بجلی کے نرخوں میں 6.83 فیصد اضافے پر حزب اختلاف کے رہنماؤں، حکمراں جماعت کے ایک رکن پارلیمنٹ اور تاجر برادری نے حکومت کو شدید تنقید کا نشانہ بنایا ہے۔ انہوں نے ہر گھر کو 200 یونٹ مفت بجلی فراہم کرنے کے حکومت کے وعدے پر سوال اٹھاتے ہوئے کہا ہے کہ وعدہ پورا کرنے کے بجائے عوام پر بجلی کی قیمتوں کا اضافی بوجھ ڈال دیا گیا ہے۔

جموں و کشمیر قانون ساز اسمبلی میں قائد حزب اختلاف سنیل شرما نے بجلی کے نرخوں میں اضافے کو عوام کے ساتھ ’’خیانت‘‘ قرار دیا۔ انہوں نے کہا کہ نیشنل کانفرنس (این سی) واضح وعدے کے ساتھ اقتدار میں آئی تھی کہ ہر گھر کو 200 یونٹ مفت بجلی فراہم کی جائے گی۔ شرما نے کہا، ’’این سی حکومت نے ہر گھر کو 200 یونٹ مفت بجلی دینے کا وعدہ کیا تھا، لیکن وعدہ پورا کرنے کے بجائے اب لوگوں کو بجلی کے نرخوں میں اضافے کا سامنا ہے۔ یہ ریلیف نہیں بلکہ عوام کے اعتماد کے ساتھ دھوکہ ہے۔‘‘

بی جے پی رہنما نے کہا کہ یکم ستمبر سے متوقع 6.83 فیصد اضافہ ایسے وقت میں عام خاندانوں پر مزید مالی بوجھ ڈالے گا، جب وہ پہلے ہی مہنگائی اور بڑھتے ہوئے گھریلو اخراجات سے پریشان ہیں۔ انہوں نے حکومت سے مطالبہ کیا کہ وہ وضاحت کرے کہ عوام سے کیے گئے وعدے اب تک کیوں پورے نہیں کیے گئے۔ قائد حزب اختلاف نے کہا کہ بی جے پی عوام کے خدشات کو مسلسل اٹھاتی رہے گی اور 2024 کے اسمبلی انتخابات کے دوران کیے گئے وعدوں کے لیے این سی کی قیادت والی حکومت کو جوابدہ بنائے گی۔ این سی کے رکن پارلیمنٹ آغا روح اللہ مہدی نے بھی حکومت کو تنقید کا نشانہ بنایا۔ انہوں نے کہا کہ یہ وہی وزیر اعلیٰ ہیں جنہوں نے کبھی ’’میٹر دریا میں پھینکنے‘‘ کا وعدہ کیا تھا، لیکن اب 200 یونٹ مفت بجلی دینے کے بجائے بجلی کے نرخوں میں تقریباً سات فیصد اضافہ کیا جا رہا ہے۔ پلوامہ سے پیپلز ڈیموکریٹک پارٹی (پی ڈی پی) کے رکن اسمبلی وحید الرحمن پرہ نے کہا کہ بجلی کے نرخوں میں اضافہ ایسے وقت کیا گیا ہے جب بے روزگاری عروج پر ہے اور عام خاندان اپنی بنیادی ضروریات پوری کرنے کے لیے جدوجہد کر رہے ہیں۔

انہوں نے سوال کیا کہ مفت بجلی کے وعدوں سے لے کر زیادہ بجلی کے بلوں تک، عوام کو دی جانے والی راحت کے وعدے کا کیا ہوا؟ انہوں نے وزیر اعلیٰ عمر عبداللہ سے این سی کے انتخابی وعدوں، جن میں 200 یونٹ مفت بجلی، مفت گیس اور مفت راشن شامل تھے، پر بھی سوالات کیے۔ اپنی پارٹی کے صدر الطاف بخاری نے بھی بجلی کے نرخوں میں اضافے کی مذمت کرتے ہوئے کہا کہ اس اقدام سے جموں و کشمیر کے عوام کی مشکلات میں مزید اضافہ ہوگا۔ انہوں نے ایسے وقت میں حکومت کے فیصلے پر سوال اٹھایا جب لوگ پہلے ہی شدید معاشی دباؤ کا سامنا کر رہے ہیں۔

دریں اثنا، کشمیر ٹریڈ الائنس نے بھی بجلی کے نرخوں میں اضافے کی مخالفت کی ہے۔ تنظیم نے کہا کہ اس فیصلے سے جموں و کشمیر کی معیشت پر منفی اثر پڑ سکتا ہے اور تاجروں و کاروباری افراد پر مالی بوجھ مزید بڑھ جائے گا۔ کشمیر ٹریڈ الائنس کے مطابق بجلی کی قیمتوں میں اضافے کے وسیع تر معاشی اثرات مرتب ہوسکتے ہیں، خصوصاً کاروباری برادری پر، جو پہلے ہی بڑھتے ہوئے اخراجات اور دیگر معاشی مشکلات سے دوچار ہے۔

ہندوستھان سماچار

ہندوستان سماچار / Aftab Ahmad Mir