وردھا، 23 اگست (ہ س) پڈوچیری سے کوریئر پارسل لے کر ہریانہ روانہ ہونے والا کنٹینر مقررہ وقت پر منزل تک نہ پہنچنے کے بعد اس میں موجود 1 کروڑ 71 لاکھ 5 ہزار 453 روپے مالیت کا سامان غائب ہونے کا معاملہ سامنے آیا ہے۔ ہنگن گھاٹ پولیس اسٹیشن کی حدود میں آجنتی علاقے کے قریب کنٹینر کے پچھلے حصے کی چادریں کاٹ کر مختلف کمپنیوں کے کوریئر پارسل چوری کیے جانے کا شبہ ظاہر کیا گیا ہے۔ اس معاملے میں پولیس نے کنٹینر کے ڈرائیور اور کلینر کے خلاف مقدمہ درج کرکے ان کی تلاش شروع کردی ہے۔ ابتدائی جانچ میں مختلف کمپنیوں کے تقریباً 25 اقسام کے کوریئر پارسل غائب پائے گئے ہیں۔
اس معاملے میں نئی دہلی کے دنیش کمار بلبیر سنگھ یادو نے ہنگن گھاٹ پولیس میں شکایت درج کرائی ہے۔ وہ ہریانہ کے بلاس پور میں شیوشکتی ٹرانسپورٹ کا کاروبار کرتے ہیں۔ ان کی ٹرانسپورٹ کمپنی کی گاڑیاں ملک بھر میں سامان کی نقل و حمل کرتی ہیں۔ 14 اگست کی رات ٹرانسپورٹ کمپنی کا ایچ آر 55 اے یو 1872 نمبر کا کنٹینر بلو ڈارٹ ایکسپریس لمیٹڈ کمپنی کے کوریئر پارسل لے کر پڈوچیری سے چنئی کے گودام کے لیے روانہ ہوا تھا۔ کنٹینر پر راجستھان کے تیجرا کے رہنے والے سلیم خان سبحان خان ڈرائیور جبکہ ہریانہ کے نگلا کے رہنے والے تعالم حبیب کلینر کے طور پر تعینات تھے۔
چنئی کے گودام پہنچنے کے بعد کنٹینر میں مزید کوریئر پارسل لوڈ کیے گئے اور اسے ہریانہ کے پٹودی اور گڑگاؤں کے لیے روانہ کیا گیا۔ حیدرآباد کے راستے وردھا اور بوٹی بوری کی جانب جاتے ہوئے 16 اگست کی دوپہر کنٹینر ہائی وے پر ایک پٹرول پمپ کے قریب کافی دیر تک کھڑا پایا گیا۔ کنٹینر کے ایک ہی مقام پر طویل وقت تک کھڑے رہنے کی اطلاع ملنے پر ٹرانسپورٹ کمپنی کے منتظمین نے ڈرائیور اور کلینر سے رابطہ کرنے کی کوشش کی، لیکن دونوں کے موبائل فون بند تھے۔ اس کے بعد انہوں نے بلو ڈارٹ کمپنی کے مرکزی دفتر سے رابطہ کرکے صورتحال سے آگاہ کیا۔
کمپنی کی جانب سے بھیجے گئے سکیورٹی گارڈ نے کنٹینر کا معائنہ کیا تو اس کے کیبن کے پچھلے حصے کی چادریں کٹی ہوئی پائی گئیں۔ جانچ میں کنٹینر کے اندر رکھے کوریئر پارسل چوری کیے جانے کا انکشاف ہوا۔ اس معاملے میں ہنگن گھاٹ پولیس نے ڈرائیور سلیم خان سبحان خان اور کلینر تعالم حبیب کے خلاف مقدمہ درج کرلیا ہے۔ پولیس فرار ملزمان کی تلاش کے ساتھ ساتھ چوری کیے گئے سامان کا بھی سراغ لگا رہی ہے۔
ہندوستھان سماچار
---------------
ہندوستان سماچار / جاوید این اے
