ممبئی ، 23 اگست (ہ س) جنوبی ممبئی کے بھولیشور علاقے میں گزشتہ رات بھولیشور کے راجا نامی عوامی گنیش اتسو منڈل کی 22 فٹ بلند اور تقریباً 2 ٹن وزنی بھگوان گنیش کی مورتی اچانک گرنے سے 2 افراد جاں بحق اور 5 دیگر زخمی ہوگئے۔ زخمیوں میں 5 اور 7 سال کی دو بچیاں بھی شامل ہیں۔ واقعے کی تفتیش وی پی روڈ پولیس اسٹیشن کی ٹیم کر رہی ہے۔
پولیس افسر کے مطابق بھولیشور کے راجا نامی معروف عوامی گنیش اتسو منڈل کی مورتی کو گزشتہ رات عقیدت مند ناچتے گاتے منڈل کی جانب لے جا رہے تھے۔ مورتی کو ایک خصوصی طور پر تیار کیے گئے پلیٹ فارم پر باندھا گیا تھا، تاہم اچانک اسٹیل فریم کی ویلڈنگ ٹوٹ گئی اور مورتی جلوس میں شامل بھیڑ پر جاگری۔ اس حادثے میں مجموعی طور پر 7 افراد زخمی ہوگئے۔
حادثے میں زخمی منڈل کے صدر سنکیت نیواسے کو گرگاؤں کے ریلائنس اسپتال لے جایا گیا، جہاں ڈاکٹروں نے انہیں مردہ قرار دے دیا۔ اسی طرح زخمی برجیش جوشی کو جی ٹی اسپتال لے جایا گیا، تاہم اسپتال پہنچنے سے پہلے ہی ان کی موت ہوگئی۔ زخمیوں میں سے 3 افراد کو جے جے اسپتال جبکہ 2 دیگر کو جی ٹی اسپتال منتقل کیا گیا ہے۔ تمام زخمیوں کا علاج جاری ہے۔ بھولیشور کے راجا عوامی گنیش اتسو منڈل کے ایک عہدیدار نے بتایا کہ حادثے میں گری ہوئی گنیش کی مورتی کا وسرجن آج رات ہی کیا جائے گا۔
ہندوستھان سماچار
--------------------
---------------
ہندوستان سماچار / جاوید این اے
