رادھے شام مندر میں پجاری کے ساتھ مار پیٹ کا معاملہ

جموں، 22 اگست (ہ س)۔ ڈوڈہ کے رادھے شیام مندر میں مبینہ مارپیٹ اور تنازعے کے بعد دونوں فریق آمنے سامنے آگئے ہیں۔ معاملے کو لے کر بابا رام داس راماینی اور سناتن دھرم سبھا ڈوڈہ کے صدر موہندر رانا کی جانب سے پولیس میں شکایات دی گئی ہیں، جن کی بنیاد پر پولیس نے تحقیقات شروع کر دی ہیں۔ اطلاعات کے مطابق آئندہ کرشن اشٹمی کے سلسلے میں مندر احاطے میں ایک اجلاس منعقد کیا گیا تھا، جس دوران کچھ افراد کے مندر میں داخلے کو لے کر تنازعہ شروع ہوگیا۔ دونوں فریقوں کی جانب سے ایک دوسرے پر الزامات عائد کیے گئے ہیں۔

سناتن دھرم سبھا ڈوڈہ کے صدر موہندر رانا نے الزام لگایا کہ کچھ افراد نے مندر احاطے میں پہنچ کر ان کی غیر موجودگی میں بابا رام داس کے ساتھ مبینہ طور پر مارپیٹ کی۔ دوسری جانب دوسرے فریق نے بابا رام داس راماینی پر مبینہ طور پر گالیاں دینے کا الزام عائد کیا ہے۔ موقع پر موجود افراد نے بیچ بچاؤ کرکے معاملہ مزید بڑھنے سے روک دیا۔تنازعے کے بعد دونوں فریق پولیس کے پاس پہنچے، جس کے بعد پولیس نے شکایات کی بنیاد پر معاملے کی چھان بین شروع کردی ہے۔ پولیس تحقیقات کے بعد ہی واقعے کی اصل صورتحال واضح ہوگی۔

دریں اثنا، سناتن دھرم سبھا کی دو کمیٹیوں کے درمیان جاری پرانے اختلافات بھی سامنے آئے ہیں۔ سناتن دھرم سبھا نگر ڈوڈہ کے صدر گگن دیپ نے الزام عائد کیا کہ دونوں فریقوں کے درمیان گزشتہ تقریباً ایک سال سے اختلافات جاری ہیں۔ ان کا کہنا ہے کہ سابقہ کمیٹی کے آمدنی و اخراجات سمیت دیگر حسابات عوام کے سامنے رکھنے کا مطالبہ کیا جا رہا ہے، تاہم اب تک مکمل حساب پیش نہیں کیا گیا۔ گگن دیپ نے معاملے میں شفافیت کا مطالبہ کرتے ہوئے متعلقہ ریکارڈ عوام کے سامنے رکھنے کی اپیل کی ہے۔ ادھر مقامی لوگوں نے تمام فریقوں سے تحمل کا مظاہرہ کرتے ہوئے باہمی بات چیت کے ذریعے معاملہ حل کرنے کی اپیل کی ہے۔

ہندوستھان سماچار

--------------

ہندوستان سماچار / محمد اصغر