لکھنؤ، 22 اگست(ہ س)۔ اترپردیش کے وزیر اعلیٰ یوگی آدتیہ ناتھ نے این سی آر خطے میں بڑھتی ہوئی فضائی آلودگی پر تشویش ظاہر کرتے ہوئے اس کی مؤثر روک تھام کے لیے تمام متعلقہ محکموں کو فوری اور ضروری اقدامات کرنے کی ہدایت دی ہے۔ حال ہی میں چیف سکریٹری نے پرالی کے مؤثر انتظام اور فضائی معیار میں بہتری کے لیے مختلف محکموں کے افسران کے ساتھ ایک اہم جائزہ اجلاس بھی منعقد کیا۔
اجلاس میں فضائی آلودگی پر قابو پانے کے لیے جاری اقدامات کا تفصیلی جائزہ لیا گیا اور افسران کو ہدایت دی گئی کہ تمام کام مقررہ مدت کے اندر مکمل کیے جائیں تاکہ آلودگی پر مؤثر کنٹرول ممکن ہوسکے۔
اجلاس میں خاص طور پر دھان کی پرالی کے انتظام کے لیے دستیاب وسائل اور زرعی مشینری کا جائزہ لیا گیا۔ افسران کو ہدایت دی گئی کہ کسانوں کو پرالی کے انتظام میں کسی قسم کی دشواری پیش نہ آئے، اس کے لیے بیلر اور دیگر ضروری زرعی مشینوں کی مناسب دستیابی یقینی بنائی جائے۔مشینری کی کمی کو دور کرنے کے لیے زیر التوا ٹینڈر عمل کو جلد از جلد مکمل کرنے کی ہدایات بھی دی گئیں۔ ساتھ ہی کھیتوں کی سطح پر نگرانی بڑھانے اور کسانوں کو پرالی نہ جلانے کے لیے مسلسل بیداری مہم چلانے پر زور دیا گیا۔وزیر اعلیٰ کی ہدایات کے مطابق اجلاس میں ان صنعتی یونٹوں کے خلاف سخت کارروائی کا فیصلہ کیا گیا جو فضائی آلودگی کے مقررہ معیار کی خلاف ورزی کررہے ہیں۔افسران کو کہا گیا کہ ایسی صنعتوں کا باقاعدگی سے معائنہ کیا جائے اور ماحولیاتی قوانین پر عمل نہ کرنے والے اداروں کے خلاف ضابطے کے مطابق کارروائی یقینی بنائی جائے۔
فضائی آلودگی پر قابو پانے کے لیے مختلف سرکاری محکموں کے درمیان مؤثر رابطے پر بھی زور دیا گیا۔ اجلاس میں ہدایت دی گئی کہ ہر متعلقہ محکمہ ایک نوڈل افسر مقرر کرے تاکہ آلودگی سے متعلق منصوبوں کی نگرانی اور ان پر بروقت عمل درآمد یقینی بنایا جاسکے۔
چیف سکریٹری ایس پی گوئل نے دھان کی پرالی کے انتظام کو ترجیحی معاملہ قرار دیتے ہوئے کہا کہ اس کے لیے ضروری وسائل اور مشینری فوری طور پر فراہم کی جائے۔ انہوں نے ہدایت دی کہ بیلر اور دیگر زرعی آلات کی خریداری کے لیے ٹینڈر عمل وقت پر مکمل کیا جائے تاکہ فصلی باقیات کا سائنسی اور مؤثر انتظام ہوسکے۔انہوں نے سڑکوں کی تعمیر و مرمت کے کاموں کا بھی جائزہ لیا اور ہدایت دی کہ روڈ ری ڈیولپمنٹ اور سڑکوں سے اٹھنے والی گرد و غبار پر قابو پانے سے متعلق تمام ضروری ٹینڈر بروقت مکمل کرکے کام مقررہ وقت میں پورا کیا جائے۔چیف سکریٹری نے سڑکوں کے گڑھوں کی مرمت اور خراب فٹ پاتھوں کی بحالی کو ترجیحی بنیادوں پر مکمل کرنے کے احکامات بھی دیے۔اجلاس میں ہر متعلقہ محکمہ کو ہدایت دی گئی کہ پون پورٹل پر فضائی آلودگی سے متعلق درست، مکمل اور تازہ ترین معلومات لازمی طور پر درج کی جائیں تاکہ حکومت کو حقیقی پیش رفت کا مؤثر انداز میں جائزہ لینے میں مدد مل سکے۔
چیف سکریٹری نے اینڈ ٹو اینڈ گاڑیوں کو ضبط کرنے کی کارروائی میں بھی مطلوبہ پیش رفت یقینی بنانے کی ہدایت دی۔ جن اضلاع میں مقررہ اہداف کے مطابق کام نہیں ہوگا وہاں ذمہ دار افسران کو اظہارِ وجہ نوٹس جاری کیے جائیں گے۔انہوں نے کہا کہ تمام کاموں کی باقاعدہ نگرانی کے لیے ماہانہ اہداف مقرر کیے جائیں اور عوام میں فضائی آلودگی کے خلاف شعور بیدار کرنے کے لیے مختلف آگاہی سرگرمیاں مسلسل منعقد کی جائیں۔
ہندوستھان سماچار
ہندوستان سماچار / Mohammad Khan
