ممبئی ، 22 اگست (ہ س)۔ وزیر اعلیٰ دیویندر فڑنویس نے طلبہ سے منشیات کی لت سے دور رہنے اور تعلیم، کھیل، ہنرمندی کی ترقی اور ملک کی تعمیر کی سمت آگے بڑھنے کی اپیل کی۔ نوی ممبئی پولیس کی ڈرگ فری نوی ممبئی مہم کے تحت وزیر اعلیٰ نے کیمپس کنیکٹ نامی خصوصی مہم کا آغاز کیا۔ وہ نیروُل میں ڈی وائی پاٹل یونیورسٹی سینٹر آف ایکسی لینس میں منعقدہ تقریب سے خطاب کر رہے تھے۔اس موقع پر وزیر جنگلات گنیش نائک، روزگار ضمانت اور باغبانی کے وزیر اور رائے گڑھ کے نگراں وزیر بھرت گوگاولے، رکن اسمبلی مندا تائی مہترے، رکن اسمبلی مہیش بالدی، رکن اسمبلی رویندر پھاٹک، رکن اسمبلی وکرم پاٹل، نوی ممبئی میونسپل کارپوریشن کی میئر سجاتا پاٹل، پنویل میونسپل کارپوریشن کے میئر نتن پاٹل، کونکن ڈویژنل کمشنر روبل اگروال، تھانے ضلع کلکٹر ڈاکٹر شری کرشن پانچال، نوی ممبئی میونسپل کمشنر کیلاش شندے، پنویل میونسپل کمشنر منگیش چتلے، رائے گڑھ ضلع پریشد کے صدر منگیش واکڈیکر، نوی ممبئی پولیس کمشنر ملند بھامبرے، ڈی وائی پاٹل کالج کے صدر وجے پاٹل سمیت دیگر معززین موجود تھے۔تقریب سے خطاب کرتے ہوئے وزیر اعلیٰ نے ہندوستان کے ڈیموگرافک ڈیویڈنڈ کا ذکر کیا اور کہا کہ ملک کی 65 فیصد نوجوان آبادی ہماری بہت بڑی طاقت ہے۔ انہوں نے کہا کہ اس نوجوان طاقت کو بے اثر کرنے کے لیے دشمن ممالک اور سماج دشمن عناصر نوجوانوں کو منشیات کا عادی بنانے کی سازش کر رہے ہیں۔ انہوں نے کہا کہ اس جنگ میں منشیات کی سپلائی چین کو مکمل طور پر ختم کرنے، نوجوانوں میں بیداری پیدا کرنے اور منشیات کی طلب کو ختم کرنے کے لیے 360 ڈگری طریقہ کار اختیار کرنے کی ضرورت ہے۔وزیر اعلیٰ نے کہا کہ ہر تعلیمی کیمپس اس لڑائی کا مرکز ہے اور ہر طالب علم انسداد منشیات مہم کا سپاہی ہے۔ طلبہ کو منشیات سے دور رہتے ہوئے تعلیم، کھیل، ہنرمندی کی ترقی اور ملک کی تعمیر کی جانب توجہ مرکوز کرنی چاہیے۔انہوں نے کہا کہ منشیات کی دلدل میں پھنسے طلبہ کی بلاامتیاز مدد کی جائے گی اور انہیں نشہ چھڑانے کے مراکز کے ذریعے ضروری تعاون فراہم کیا جائے گا۔ وزیر اعلیٰ نے سوامی وویکانند کے خیالات کا حوالہ دیتے ہوئے کہا کہ صحیح سمت میں استعمال ہونے والی نوجوان طاقت معاشرے کے لیے آکسیجن بن جاتی ہے اور زندگی بخشنے کا کام کرتی ہے۔

ہندوستھان سماچار

--------------------

ہندوستان سماچار / جاوید این اے