مہاراشٹر پولیس کے ریٹائرڈ کتوں کی تاحیات دیکھ بھال کرے گی حکومت

ممبئی ، 22 اگست (ہ س)۔ مہاراشٹر حکومت نے ہفتہ کے روز فیصلہ کیا ہے کہ پولیس محکمہ سے ریٹائر ہونے والے کتوں کی تاحیات دیکھ بھال بھی پولیس محکمہ ہی کرے گا۔ اس فیصلے کے تحت اب ڈیوٹی سے ریٹائر ہونے کے بعد ان کتوں کو کسی تیسرے فریق کو گود دینے کے بجائے ان کے سابق ہینڈلرز کے ساتھ ہی رکھا جائے گا اور ان کی دیکھ بھال کا مکمل خرچ حکومت برداشت کرے گی۔

وزیر اعلیٰ کے دفتر کے مطابق، وزیر اعلیٰ دیویندر فڑنویس کی ہدایت پر لیے گئے اس فیصلے کے تحت ریٹائرڈ پولیس ڈاگس پولیس محکمہ کی ذمہ داری میں رہیں گے۔ ان کے کھانے، ضروری طبی علاج اور رہائش سمیت دیگر اخراجات محکمہ داخلہ برداشت کرے گا۔ موجودہ نظام کے تحت پولیس کے کتے تقریباً 10 سال کی فعال خدمت کے بعد ریٹائر ہوتے ہیں۔ دوران خدمت یہ کتے مشتبہ افراد کا سراغ لگانے، دھماکہ خیز مواد کی شناخت کرنے اور لاپتہ افراد کی تلاش جیسے اہم کاموں میں پولیس کی مدد کرتے ہیں۔

پولیس محکمہ سے ریٹائر ہونے کے بعد ان کتوں کو عام طور پر بیرونی افراد کو گود دینے کا انتظام تھا۔ تاہم، طویل عرصے تک ساتھ رہنے والے ہینڈلر اور مانوس ماحول سے اچانک دور ہونے کے باعث ان کتوں کو کئی مرتبہ ذہنی پریشانی کا سامنا کرنا پڑتا تھا۔ بعض معاملات میں ریٹائرمنٹ کے بعد کتوں کے کھانا پینا چھوڑ دینے کے واقعات بھی سامنے آئے ہیں۔

ریاستی انتظامیہ کے مطابق، جس کتے نے تقریباً ایک دہائی تک پولیس فورس کی خدمت کی ہو، اسے ریٹائرمنٹ کے بعد پریشانی کا سامنا نہیں کرنا چاہیے۔ نئی پالیسی کا مقصد پولیس ڈاگس کو باوقار ریٹائرمنٹ فراہم کرنا اور ان کے ہینڈلرز کے ساتھ قائم جذباتی وابستگی کو برقرار رکھنا ہے۔ حکومت کے اس فیصلے سے مہاراشٹر پولیس کے ریٹائرڈ کتوں کو زندگی بھر محفوظ اور مانوس ماحول میں دیکھ بھال فراہم کرنے کی راہ ہموار ہو گئی ہے۔

ہندوستھان سماچار

--------------------

ہندوستان سماچار / جاوید این اے