جموں, 22 اگست (ہ س): گورنمنٹ میڈیکل کالج ڈوڈہ کے نان گزٹیڈ ملازمین نے تقرری اور سروس رولز سے متعلق اپنے دیرینہ مطالبات کے حل کی تحریری یقین دہانی کے بعد غیر معینہ مدت کی پرامن ہڑتال 30 ستمبر تک ملتوی کر دی ہے۔ملازمین کی جانب سے جاری بیان میں کہا گیا ہے کہ وزیر صحت و طبی تعلیم اور جموں و کشمیر ہیلتھ اینڈ میڈیکل ایجوکیشن کی جانب سے انہیں یقین دہانی کرائی گئی ہے کہ ریکروٹمنٹ اور سروس رولز سے متعلق زیر التوا معاملے کو حل کیا جائے گا۔

ملازمین کے مطابق جی ایم سی ڈوڈہ سمیت نئے گورنمنٹ میڈیکل کالجوں کے نان گزٹیڈ ملازمین گزشتہ کئی عرصے سے سروس رولز کو حتمی شکل دینے اور انہیں نوٹیفائی کرنے کا مطالبہ کر رہے ہیں۔ ان کا کہنا ہے کہ سروس رولز کے معاملے میں تاخیر کے باعث ملازمین کی ترقی، محکمانہ ترقیاتی کمیٹی اور کیریئر پروگریشن سے متعلق معاملات متاثر ہو رہے ہیں۔

ملازمین نے کہا کہ حکومت کی تحریری یقین دہانی کے پیش نظر انہوں نے اپنا احتجاج عارضی طور پر 30 ستمبر تک ملتوی کرنے کا فیصلہ کیا ہے۔ انہوں نے واضح کیا کہ مقررہ مدت تک مطالبات پر پیش رفت نہ ہونے کی صورت میں آئندہ کے لائحہ عمل پر غور کیا جائے گا۔واضح رہے کہ جی یم سیز کے نان گزٹیڈ ملازمین کی جانب سے ریکروٹمنٹ اور سروس رولز کے معاملے پر غیر معینہ مدت کی ہڑتال شروع کی گئی تھی، جس کے بعد حکومت کی جانب سے معاملہ حل کرنے کی یقین دہانی کرائی گئی ہے۔

ہندوستھان سماچار

---------------

ہندوستان سماچار / محمد اصغر