ڈگری کالج ڈوڈہ کے طلباء نے چھاترو معاملے کے خلاف احتجاج کیا

جموں، 22 اگست (ہ س)۔ ضلع کشتواڑ کے چھاترو علاقے میں 14 سالہ نابالغ لڑکی کی مبینہ عصمت دری اور حمل کے سات ماہ بعد اسقاط حمل کی کوشش کے دوران موت کے واقعہ کے خلاف احتجاج کا سلسلہ جاری ہے۔ پیر کے روز ڈگری کالج ڈوڈہ کے طلباء نے احتجاج کرتے ہوئے ملزم استاد کے خلاف سخت کارروائی اور متاثرہ کو انصاف فراہم کرنے کا مطالبہ کیا۔

طلباء نے کالج سے باہر نکل کر ڈوڈہ گھٹ روڈ کو بند کر دیا اور ملزم کو سخت ترین سزا دینے کا مطالبہ کیا۔ پولیس نے موقع پر پہنچ کر احتجاج کر رہے طلباء کو سڑک سے ہٹایا، جس کے بعد ٹریفک کی آمدورفت بحال کی گئی۔ قابل ذکر ہے کہ چھاترو میں ایک 14 سالہ لڑکی مبینہ طور پر ایک اسکول ٹیچر کے ساتھ جنسی تعلق کے بعد حاملہ ہوئی تھی۔ حمل کے سات ماہ بعد اسے مبینہ طور پر اسقاط حمل کے لیے لے جایا گیا، تاہم دورانِ علاج اس کی حالت بگڑ گئی۔

متاثرہ کو پہلے ڈوڈہ لایا گیا اور بعد ازاں جموں منتقل کیا جا رہا تھا، تاہم بٹوت کے قریب اس کی موت واقع ہوگئی۔ پولیس نے واقعہ کے سلسلے میں مقدمہ درج کرکے ملزم استاد کو گرفتار کر لیا ہے، جبکہ محکمہ تعلیم نے بھی ملزم کو معطل کر دیا ہے۔

ہندوستھان سماچار

--------------

ہندوستان سماچار / محمد اصغر