شیلانگ، 22 اگست(ہ س)۔ آسام اور میگھالیہ کے درمیان بڑھتی کشیدگی کے باعث شیلانگ میں جمعہ کی شام سے پٹرول پمپوں پر گاڑیوں کی لمبی قطاریں دیکھی گئیں۔ جوڑاباٹ میں جاری سڑک ناکہ بندی کے باعث میگھالیہ میں ایندھن کی سپلائی متاثر ہونے کے خدشے کے پیش نظر بڑی تعداد میں لوگ اپنی گاڑیوں میں پٹرول بھرانے کے لیے پٹرول پمپوں کا رخ کرنے لگے۔

گواہاٹی کے مضافاتی علاقے جوراباٹ میں جاری ناکہ بندی ہفتے کے روز تیسرے دن میں داخل ہوگئی۔ یہ احتجاج 19 اگست کو شیلانگ میں خاسی اسٹوڈنٹس یونین (کے ایس یو) کی جانب سے نکالی گئی سیاہ پرچم ریلی کے دوران آسام میں رجسٹرڈ گاڑیوں اور سیاحوں پر مبینہ حملوں کے بعد شروع ہوا تھا۔ اس دوران کئی گاڑیوں میں توڑ پھوڑ اور بعض سیاحوں کے زخمی ہونے کی اطلاعات سامنے آئی تھیں۔جوراباٹ میں مظاہرین میگھالیہ نمبر والی گاڑیوں کو روک کر انہیں واپس جانے کے لیے کہہ رہے ہیں۔ کسی بھی ناخوشگوار واقعے کی روک تھام کے لیے علاقے میں پولیس اور ریزرو فورس کی مناسب تعداد میں تعیناتی کی گئی ہے۔

موجودہ صورتحال کے باعث آسام اور میگھالیہ کے درمیان گاڑیوں کی آمدورفت اور ضروری اشیا کی سپلائی کو لے کر بھی تشویش بڑھ گئی ہے۔ شیلانگ میں پٹرول کی سپلائی متاثر ہونے کی افواہیں پھیلنے کے بعد پٹرول پمپوں پر اچانک لوگوں کی بھیڑ بڑھ گئی۔

سوشل میڈیا پر پٹرولیم ورکرز یونین کی جانب سے ایندھن کی سپلائی روکنے کے مبینہ فیصلے سے متعلق پیغامات نے بھی لوگوں کی تشویش میں اضافہ کردیا۔ پٹرول پمپوں پر بڑی تعداد میں گاڑیوں کے پہنچنے کے باعث شیلانگ کے کئی علاقوں میں ٹریفک متاثر ہوا اور گاڑیوں کی قطاریں مرکزی سڑکوں تک پہنچ گئیں۔

دوسری جانب آسام کی طرف احتجاج کرنے والے کیب ڈرائیوروں نے تنازع کو جلد حل کرنے کا مطالبہ کیا ہے۔ انہوں نے شیلانگ میں تشدد کے دوران نقصان پہنچنے والی گاڑیوں کے لیے معاوضہ اور متعلقہ حکام سے معافی کا مطالبہ کیا۔مظاہرین نے میگھالیہ میں رجسٹرڈ آسام کی گاڑیوں کو پہنچنے والے ممکنہ نقصان کی تلافی کا بھی مطالبہ کیا۔ ان کا کہنا ہے کہ کے ایس یو کی جانب سے اٹھائے گئے مسائل کو ٹکراؤ کے بجائے بات چیت کے ذریعے حل کیا جانا چاہیے۔جوراباٹ میں احتجاج کرنے والے ایک کیب ڈرائیور نے کہا کہ معاملہ ابھی تک حل نہیں ہوا، اسی لیے احتجاج جاری ہے۔ انہوں نے کہا کہ وہ مسئلے کا حل چاہتے ہیں، لیکن تین دن گزرنے کے باوجود کوئی پیش رفت نہیں ہوئی۔ انہوں نے اپنی گاڑیوں کو پہنچنے والے نقصان کے لیے معاوضے کا مطالبہ کرتے ہوئے کہا کہ میگھالیہ کی گاڑیوں کو ہوئے نقصان کی بھی بھرپائی ہونی چاہیے۔مظاہرین نے آسام اور میگھالیہ کی حکومتوں سے فوری مداخلت کی اپیل کرتے ہوئے کہا کہ چند افراد کی سرگرمیوں کا خمیازہ دونوں پڑوسی ریاستوں کے عام شہریوں کو نہیں بھگتنا چاہیے۔

ہندوستھان سماچار

ہندوستان سماچار / Mohammad Khan