جموں، 21 اگست (ہ س)۔
جموں کے بنتلاب کے کھیری علاقے میں زمین دھنسنے کے باعث متعدد مکانات میں دراڑیں پڑنے کے بعد تقریباً ایک درجن خاندان خیموں میں منتقل ہوگئے ہیں۔ زمین مسلسل دھنسنے کے باعث مقامی لوگوں میں خوف پایا جا رہا ہے۔ کھیری جموں شہر سے تقریباً 10 سے 12 کلومیٹر دور پہاڑی علاقے میں واقع ہے۔ متاثرہ مکانات میں دراڑیں پڑنے اور مزید نقصان کے خدشے کے پیش نظر انتظامیہ نے لوگوں کو محفوظ مقامات پر منتقل ہونے کی ہدایت دی ہے۔
مقامی باشندے نے بتایا کہ تقریباً ایک درجن مکانات زمین دھنسنے سے متاثر ہوئے ہیں۔ انہوں نے کہا کہ ان کے مکان کی تعمیر کے چند سال بعد زمین کا ایک حصہ دھنسنے اور دوسرا حصہ بلند ہونے لگا، جس کے نتیجے میں مکان میں دراڑیں پڑ گئیں۔ ان کے بھائی کا زیر تعمیر مکان بھی زمین کھسکنے کے باعث مکمل ہونے سے قبل منہدم ہوگیا۔
مقامی خاتون منیرہ بی بی نے بتایا کہ مکان میں دراڑیں پڑنے کے بعد وہاں رہنا خطرناک ہوگیا ہے اور اہل خانہ مسلسل خوف کے سائے میں زندگی گزار رہے ہیں۔
متاثرین نے انتظامیہ سے علاقے کا تفصیلی ارضیاتی اور تکنیکی سروے کرانے اور مسئلے کا مستقل حل تلاش کرنے کا مطالبہ کیا ہے۔ ان کا کہنا ہے کہ عارضی خیمے اور امداد فراہم کی گئی ہے، تاہم بارش کے موسم میں طویل عرصے تک خیموں میں رہنا مشکل ہوگا۔
ضلع مجسٹریٹ دیپک کمار نے کہا کہ انتظامیہ نے صورتحال کا نوٹس لے لیا ہے اور لوگوں کو محفوظ مقامات پر منتقل ہونے کا مشورہ دیا گیا ہے۔ انہوں نے بتایا کہ زمین کے ایک محدود حصے میں یہ مسئلہ پیدا ہوا ہے اور ماہرین اس کی بنیادی وجہ معلوم کرنے کے لیے سروے کر رہے ہیں۔انہوں نے کہا کہ محفوظ مقام پر منتقل ہونے سے قاصر افراد ضرورت پڑنے پر سرکاری رہائش کے لیے انتظامیہ سے رابطہ کرسکتے ہیں، جبکہ صورتحال سے نمٹنے کے لیے تمام ضروری احتیاطی اقدامات کیے جا رہے ہیں۔
ہندوستھان سماچار
ہندوستان سماچار / محمد اصغر
