نئی دہلی، 21 اگست (ہ س)۔

جنتر منتر پر 20 جولائی کو پارلیمنٹ کی جانب مارچ کے دوران مبینہ طور پر پیلٹ لگنے سے دائیں آنکھ کی بینائی کھونے والے طالب علم ساحل لوچب کی شکایت پر جمعہ کو دہلی پولیس نے ایف آئی آر درج کر لی۔ کانگریس لیڈر راہل گاندھی کی مداخلت کے بعد ساحل اور اس کے اہل خانہ کی جانب سے مسلسل کی جا رہی ایف آئی آر درج کرنے کی مانگ پر پولیس نے نامعلوم افراد کے خلاف مقدمہ درج کیا ہے۔ ساحل نے شکایت میں واقعے کی تحقیقات کے ساتھ علاج اور معاوضے کا انتظام کیے جانے کا مطالبہ کیا ہے۔

ساحل نے ایف آئی آر میں الزام لگایا ہے کہ 20 جولائی کو احتجاج کے دوران اس پر پانچ سے چھ مرتبہ پیلٹ گن چلائے گئے۔ اس کے مطابق وہ جنتر منتر پر طلبہ کے احتجاج میں شامل ہوا تھا۔ وہاں سے پارلیمنٹ کی جانب مارچ کے دوران لاٹھی چارج اور آنسو گیس کے درمیان بھگدڑ مچ گئی۔ وہ بھیڑ کے ساتھ پالیکا-کناٹ پلیس علاقے کی طرف پہنچا تھا۔ ساحل کا دعویٰ ہے کہ اسی دوران اس کے جسم کے دائیں حصے، سینے، بازو اور آنکھ کے قریب کئی پیلٹ لگے۔ اس کے بعد اس کی آنکھ، چہرے، ہاتھ اور سینے سے خون بہنے لگا اور دائیں آنکھ سے دکھائی دینا بند ہو گیا۔

شکایت کے مطابق، ایمس میں کیے گئے سی ٹی اسکین میں اس کے جسم میں 200 سے زائد چھرے پائے گئے۔ یہ چھرے آنکھ، گردن، سینے، جبڑے اور بازو سمیت جسم کے کئی حصوں میں موجود ہیں۔ دائیں آنکھ کے گڑھے اور اس کے پیچھے بھی چھرے موجود ہیں۔ ساحل کے مطابق، کچھ چھرے اعصاب کے انتہائی قریب ہونے کی وجہ سے نکالے نہیں جا سکتے۔ اس کا کہنا ہے کہ ڈاکٹروں نے بتایا ہے کہ آنکھ کے اندر موجود دو چھرے طویل عرصے تک، ممکنہ طور پر زندگی بھر رہ سکتے ہیں۔ سینے میں دل کے قریب موجود چھروں کے بارے میں بھی ڈاکٹروں نے طویل علاج کی بات کہی ہے۔

ساحل کے مطابق، واقعے کے بعد اسے پہلے لیڈی ہارڈنگ اسپتال لے جایا گیا۔ اس کے بعد صفدرجنگ اسپتال اور پھر ایمس منتقل کیا گیا۔ ایمس کے آر پی سی آئی سینٹر اور ٹراما سینٹر میں اس کا علاج ہوا۔ 22 جولائی کو آنکھ کی پہلی سرجری کی گئی۔ بعد میں یکم اگست کو دوسری سرجری ہوئی۔ شکایت کے مطابق، دونوں سرجریوں کے بعد بھی دائیں آنکھ کی حالت میں کوئی بہتری نہیں آئی۔ ڈاکٹروں نے آنکھ کی بینائی واپس آنے کے امکانات انتہائی کم بتائے ہیں۔ ساحل نے کہا ہے کہ اس کا علاج طویل عرصے تک چلے گا اور جسم میں موجود چھروں کی وجہ سے مستقبل میں بھی علاج کی ضرورت پڑے گی۔

ساحل نے شکایت میں کہا ہے کہ واقعے کو چار ہفتے سے زیادہ گزرنے کے باوجود اس کی ایف آئی آر درج نہیں کی گئی تھی۔ اب اس نے پولیس سے پورے معاملے کی غیر جانب دارانہ تحقیقات کا مطالبہ کیا ہے۔ ساحل نے تحقیقات کے لیے 20 جولائی کے واقعات سے متعلق تمام الیکٹرانک شواہد محفوظ رکھنے کی درخواست کی ہے۔ ان میں جنتر منتر، پارلیمنٹ مارگ، کناٹ پلیس کے اندر اور باہر کے علاقے، پٹیل چوک، راجیو چوک، میٹرو اسٹیشنوں اور ٹریفک پولیس کی سی سی ٹی وی فوٹیج شامل ہیں۔ اس نے اس دن کی ڈرون فوٹیج بھی محفوظ کرانے کا مطالبہ کیا ہے۔

شکایت میں ساحل نے آپریشن کے دوران اس کے جسم سے نکالے گئے دھاتی چھروں کو پولیس کے قبضے میں لے کر ان کی جانچ کرانے کا مطالبہ کیا ہے۔ اس کے ساتھ ہی لیڈی ہارڈنگ اسپتال، صفدرجنگ اسپتال اور ایمس سے متعلق تمام طبی ریکارڈ اور ایم ایس سی کی جانچ کو بھی تحقیقات میں شامل کرنے کی درخواست کی ہے۔

ہندوستھان سماچار

ہندوستان سماچار / عطاءاللہ