نئی دہلی، 21 اگست(ہ س )۔

بھارت کے سالانہ فی کس آمدنی کے معاملے میں بنگلہ دیش سے بھی پیچھے رہ جانے پر عام آدمی پارٹی کے قومی کنوینر اروند کیجریوال نے گہری تشویش کا اظہار کیا ہے۔ انہوں نے سوشل میڈیا پلیٹ فارم ایکس پر کہا کہ آج فی کس آمدنی کے معاملے میں بھارت بنگلہ دیش سے بھی پیچھے ہو گیا ہے۔ ملک نے مودی جی کو وزیر اعظم اس لیے بنایا تھا کہ وہ ہمیں دنیا کا سب سے امیر ملک بنائیں گے، لیکن انہوں نے تو بھارت کو بنگلہ دیش سے بھی غریب بنا دیا۔ آج بھارت کی فی کس آمدنی 2800 ڈالر ہے، جبکہ بنگلہ دیش کی 2900 ڈالر ہے۔جمعہ کو ایک ویڈیو جاری کرتے ہوئے اروند کیجریوال نے کہا کہ میں ایک ایسی بات بتانے جا رہا ہوں جسے سن کر ہر محبِ وطن کو بڑا دھچکا لگے گا۔ بھارت کو بنگلہ دیش سے بھی زیادہ غریب ملک قرار دیا گیا ہے۔ بھارت کی سالانہ فی کس آمدنی 2800 ڈالر ہے، جبکہ بنگلہ دیش کی 2900 ڈالر ہے۔ 2014 میں جب مودی وزیر اعظم بنے تھے، تب ہماری فی کس آمدنی بنگلہ دیش سے بہت زیادہ تھی۔ 2014 میں ہماری فی کس آمدنی 1600 ڈالر تھی اور بنگلہ دیش کی 1100 ڈالر تھی، لیکن آج بنگلہ دیش ہم سے آگے نکل گیا ہے۔ اروند کیجریوال نے بتایا کہ سوئٹزرلینڈ کی فی کس آمدنی 1,15,000 ڈالر، سنگاپور کی 99,000 ڈالر اور امریکہ کی 90,000 ڈالر ہے۔ 2014 میں لوگوں نے بڑی امید کے ساتھ مودی جی کو وزیر اعظم بنایا تھا کہ ہم امریکہ کو پیچھے چھوڑ دیں گے۔ ہمیں کیا معلوم تھا کہ عالمی گرو بننے کا خواب دکھانے والے لوگ ملک کو اتنا لوٹیں گے اور نچوڑیں گے کہ 12 سال بعد بھارت بنگلہ دیش سے بھی زیادہ غریب ہو جائے گا۔

ہندوستھان سماچار

ہندوستان سماچار / Md Owais Owais