جموں, 21 اگست (ہ س)۔

چینی پلاسٹک ڈور کی فروخت، ذخیرہ اور استعمال کے خلاف جاری کارروائی کے دوران جموں پولیس نے ایک نابالغ کو گرفتار کرکے اس کے زیر استعمال گاڑی سے ممنوعہ مانجھا کی 70 چرخیاں برآمد کی ہیں۔

پولیس حکام کے مطابق مخصوص اطلاع ملنے پر نروال پولیس چوکی کی ایک ٹیم نے کارروائی کرتے ہوئے نابالغ کو حراست میں لیا۔ قانونی ضابطوں کے تحت نابالغ کی شناخت ظاہر نہیں کی گئی۔ تفتیش کے دوران گاڑی سے چینی پلاسٹک مانجھا کی 70 چرخیاں برآمد کرکے قبضے میں لے لی گئیں۔

پولیس نے بتایا کہ خطرناک اور ناقابل تحلیل مصنوعی دھاگے سے تیار ہونے کے باعث چینی مانجھا کی فروخت، ذخیرہ اندوزی اور استعمال پر متعلقہ حکام کی جانب سے پابندی عائد ہے۔ یہ مانجھا راہگیروں، موٹر سائیکل سواروں اور بچوں کے لیے شدید خطرہ بن سکتا ہے جبکہ پرندوں اور دیگر جانوروں کو بھی نقصان پہنچا سکتا ہے۔

اس سلسلے میں تھانہ باہو فورٹ میں بھارتیہ نیائے سنہتا کی دفعہ 223 کے تحت ایف آئی آر نمبر 259/2026 درج کرکے مزید تفتیش شروع کردی گئی ہے۔

جموں پولیس نے واضح کیا ہے کہ ممنوعہ چینی مانجھا کی فروخت، ذخیرہ، نقل و حمل یا استعمال میں ملوث افراد کے خلاف سخت قانونی کارروائی کی جائے گی۔ پولیس نے عوام سے اپیل کی ہے کہ ممنوعہ مانجھا کی فروخت یا استعمال سے متعلق کسی بھی اطلاع کو قریبی پولیس تھانے تک پہنچائیں۔

ہندوستھان سماچار

---------------

ہندوستان سماچار / محمد اصغر