مشرقی سنگھ بھوم، 21 اگست (ہ س)۔ مانگو کے کنور بستی علاقے میں جمعہ کے روز سورن ریکھا ندی کے کنارے تجاوزات ہٹانے پہنچی انتظامیہ کی ٹیم نے جے سی بی سے تین مکانات منہدم کر دیئے۔ انہدامی کارروائی کے دوران اپنے آشیانوں کو ٹوٹتا دیکھ کر متاثرہ خاندان جذباتی ہو کر روتے رہے اور ہاتھ جوڑ کر حکام سے اپنے گھروں کو بچانے کی التجا کرتے رہے ۔ تاہم انتظامیہ نے کارروائی نہیں روکی اور کچھ ہی دیر میں تینوں مکانات ملبے کا ڈھیر بن گئے۔

تجاوزات ہٹاے کے لئے انتظامی حکام کی قیادت میں پولیس دستے کی تعینانی کے دوران جے سی بی موقع پر پہنچی ۔ کارروائی شروع ہوتے ہی متاثرہ خاندانوں میں افراتفری مچ گئی ۔ متاثرین نے حکام سے کارروائی بند کرنے کی استدعا کی۔ انہوں نے ہاتھ جوڑ کر اپنے گھر بچانے کی التجا کی لیکن انتظامیہ کی ٹیم اپنے فیصلے پر ڈتی رہی۔

صورتحال پر قابو پانے کے لیے پولیس کی بڑی تعداد جائے وقوعہ پر موجود تھی۔ متاثرین اور مقامی رہائشیوں کو گرنے والے مکانات کے قریب جانے سے روک دیا گیا۔ عینی شاہدین کے مطابق پولیس نے لوگوں کو روکنے کے لیے لاٹھی چارج کیا جس سے جائے وقوعہ پر کشیدگی مزید بڑھ گئی۔ پولیس کی بھاری موجودگی میں مکین اپنی آنکھوں کے سامنے اپنے ہی گھر گرتے دیکھتے رہے۔

بلاک ڈیولپمنٹ آفیسر برجیش سریواستو نے بتایا کہ متعلقہ مکان مالکان کو پہلے نوٹس جاری کیا گیا تھا۔ انتظامیہ نے یہ کارروائی مقررہ مدت میں تجاوزات نہ ہٹانے پر کی۔ انتظامیہ نے کہا کہ دریائے سورن ریکھا کے کنارے غیر قانونی تعمیرات دریا کے علاقے کے لیے سنگین مسائل پیدا کر سکتی ہیں اور یہ کہ دریا کی زمین کو تجاوزات سے پاک کرنا ضروری ہے۔ ادھر مکانات گرائے جانے کے بعد متاثرہ خاندانوں نے انتظامیہ کے خلاف برہمی کا اظہار کیا۔

مقامی باشندوں کا دعویٰ ہے کہ دریائے سورن ریکھا کے کنارے کئی بڑی عمارتیں اور تجارتی ادارے طویل عرصے سے موجود ہیں۔ انہوں نے سوال کیا کہ اگر انتظامیہ کا مقصد ندی کے کنارے کو تجاوزات سے پاک کرنا ہے تو اعلیٰ اور بااثر افراد کی مبینہ غیر قانونی تعمیرات سے کیوں نہیں نمٹا جا رہا ہے۔

مقامی لوگوں نے پورے مانگو کے علاقے میں دریائے سورن ریکھا کے کنارے تمام تعمیرات کی غیر جانبدارانہ تحقیقات اور کارروائی سے متاثرہ خاندانوں کے لیے متبادل رہائش یا بحالی کا مطالبہ کیا ہے۔

ہندوستھان سماچار

ہندوستان سماچار / محمد شہزاد